فونت زيبا سازفونت زيبا سازفونت زيبا سازفونت زيبا سازفونت زيبا سازفونت زيبا سازفونت زيبا ساز
فونت زيبا ساز
يازیچی

يازیچی

تحکیه-شعر رومان و بوتونلوکله ادبييات و البته اونون پوئتيكاسی

 

کيشي رجزيندن قادين سسينه سوروشن پروسه دالغاسيندا

فرکانسيمين هنديورينده،

                 حلول ائتدييين توزو،

                       زادگان باخيشين بيج ايشارتيسيندا

                                                     ديليمه، اؤزومه

                                                             نئجه دئيه­ يديم؟

سيلکه­ لن عزيزيم!

تولانبار داميندا لاله­­ مي ساخلا!

ناغيل عالمينده رجز،

                   رجزدن عالمي ساخلا!

                         قادين سسينه سوروشن پروسه دالغاسيندا

 

ناغيل هئيبتيندن آغ-آپپاغي روحوم

«وور» دئيه ­ن، «اؤلدور» دئمه ­دي.

                              «اؤلدورمه» ده دئمه ­دي.

توز اولماغا نه وار کي؟

بونلاری، بونلاری

                  ديليمه، اؤزومه،

                                   نئجه دئيه ­يديم؟

 

سيلکه ­لن عزيزيم!

سحر خوروزسوز آچيلمير.

ناغيل-ناغيل، ال-اله

 بير يول، ايشيق   بير يول، قارا

  من قاييتماق ايسته ­ييرم

    کيشي رجزيندن قادين سسينه سوروشن پروسه دالغاسيندا



91/6/14

 

 

+ يازيليبدير  91/06/15ساعات 12:4  محمد صبحدل   | 

من­دن    اوچ من    يولا دوشور

اوچ من    من­دن    يولا دوشور

يولا دوشور    اوچ من    من­دن

 

قاتيل سولار عشقينه ياخيلير بيريم

بيريم ، اله ­نير كوللري، «اله ­نير» آنلاميندان

بيريمده ايلك آتيش­دا ، تورپاغاسانجيلير،

                                                بوياسيز جمده ­يي.

اؤلورم بيرلريمده اوچ دفه

اؤلورم اوچ دفه

گومولورم يول آيريملاريندا

و يولا دوشورم بيرده

 

من­دن يولا دوشورم

اوچ من يولا دوشورم.

+ يازيليبدير  87/03/21ساعات 12:6  محمد صبحدل   | 

شوشايا دومان گليب،

اوره­ييمه گومان گليب

هر درديمي- سريمي

سينه­م­ دن قووان گليب.

 

(يئرلي شاعير حوسام­الددين آلوولونون

«جان دفتري»ندن دؤرد ميصراع)

 

1

 

دوپپا داداش الينده­کي کاماني ساغا-سولا آپارا-آپارا کامانچانين تئللريني دينديرديکجه کامانچانين بو آب-هاوانين تميزليييندن، پاکليغيندان، بولاقلارين صافليغيندان، گولون گولو، چيچه­يين چيچه­يي چاغيرماسيندان، دوستلوقدان، وفادان، ايلقاردان دم ووران سسي شوشا ساناتوريياسينين بوتون حيط-باجاسينا ياييليردي و دوپپا داداشين زررافه بوينو کيمي اوزون بوينونون اوستونده­کي يئکه باشي­دا الينده کي کامانين حرکتينه هماهنگ گاه ساغا گئديردي، گاه سولا گئديردي و بو دم هئچ کامانچانين سسيني ائشيتمه­ين ده اولسايدي، دوپپا داداشين اوزون کيرپيکلري ايري، قارا گؤزلريندن بيلردي کي، دوياردي کي، صؤحبت نه­دن گئدير.


مطلبين آردي
+ يازيليبدير  87/03/21ساعات 11:43  محمد صبحدل   | 

گونوم گونش گونوسودور

                           قيزديريردا  قيزارديردا

و پيرتلاشيق آدام خئيلاغيندان تؤرنتي­سيز

                                   تسبئحه دوزولن آياقلار

 

نه ياشيد گوپلار ياشاميش «من»-«سن» آنلاميندا !

 

قوناق قوناغي ايسته ­ميردي آنام­سا قادين­ليغين

و من صحنه-صحنه هيچقيريق اوزره

                          سورغو      جاواب     ايستينطاق

دلي ائل­سيز     ائل دلي­سيز

د­ده­ مين اؤتدويو ياشلارا واريرام

                {و آبيده دامارلاريندا تانيش بولانديريق قان

                         هوس ايميش بس ايميش يازديلار}

 

گئجيكدي هر نه ­ييميز!     هه!       گئجيكدي هر نه ­ييميز!

دلي ائل­سيز    ائل دلي­سيز

+ يازيليبدير  86/06/29ساعات 18:38  محمد صبحدل   | 

مئلودي اوُشاقلاري­لا پيچيلتي­لار نفسيندن  اسن كوْرون اوْغلو

سيگناللي آتلاري­لا ايسرافيلين توتکيندن قوُلاقدادير...

و ديليمه آچيلان شهيد چرچيوه ­لر سيراسيندان

                                   بوُروُلغان اوزره بوُروُلغان

                                     فيرلانيردي ايكي باخيش ايچلرينده

جيب­لرده قوُرتولوش ناغيليندان

 

ياشيني گيزله­ دير بو اورتا ياشلي قادين هه! بو سمفوني

عالم هوس­له ­نير بوُ نفس­دن

مئلودي اوُشاقلاري­لا پيچيلتي­لار نفسيندن  اسن كوْرون اوْغلو-قيزي

ياشسيز ياشير بو اورتا ياشلي قادين هه! بو سمفوني

ديلسيز بو چرچيوه

 

          { و ناغيليمي شهرزادين چوروموش جومجومه ­سينده يئل سسله-

            ديرسه ده هئچ كس دوشونمه ­دي.

            چونكو شهرزاد دئييلديلر و ناغيللاري، ناغيليم دئييلدي.}

 

آلدانمارام داها

دونيا بوْيو گيل تاج ايميش باشيمداكي بؤركوم

و سيچمايينجا يئديم دئمه ­م.

 

من شهرزاد جومجمه ­سيندن اسن يئلم

                 (مئلودي اوُشاقلاريلا پيچيلتي­لار...)

عالم نفس­له ­نير  بوُ هوس­دن

                                                                             ۸۶/۴/۱۶
+ يازيليبدير  86/04/17ساعات 8:41  محمد صبحدل   | 

سئوينجيمي داشدان كسير

وسونونجو    سومويومو    قورتورولماقدان .

 

سانجيلير سؤزوم

                     يوردومون زمي­لرينده ،

تؤره ­نير اوچ­ بوجاق قويولارلا

اوچ قاتلي بير كفني قوسدورور

                            اوچ جانلي بر ملك بدنينده

و دانيشيغيم سؤزومده سانجيلير يئني­دن    اوووق-اوووق

اوچ جانلي بير ملك بدنينده

 

النديرين مني هي!    اوووق – اوووق    النديرين مني هي!

 

بيرينجي جمده ­ييمي كئچيرديم      اوچونجو قاتدان اؤترسم

الكدن آرتيرا بيلمه ­م        النديرين مني هي!

  

يامان يالانليــــغيا دوشــدوم      گــولو   يئــل ايله  بؤلوشدوم

يئـــل اسدي هنديوريمدن         گول اوچون اؤلدوم اؤلوشـ...

 

و دانيشيغيم سؤزومده سانجيلير يئني­دن

اوچ جانلي بير ملك بدنينده    سئوينجيمي داشدان كسير

و قايتارير كفنين اوچونجو قيرناسيني بيرده

الكدن آرتيق الكدير    النديرين مني هي!

 

+ يازيليبدير  86/04/11ساعات 3:50  محمد صبحدل   | 

نبي كسدي قوربانين باشيني. قويدو بير توربا ايچينه. قوربانين گؤزلري بره­لنميشدي.

مريم: - قورخوبدور،- دئيه، آزجا فيكيرلشدي. اؤزونو اونون يئرينه قويدو.- آتام اونا بير گيله سو دا وئرمه­دي، من ده اولسايديم قورخارديم. مخصوصن ده ، بيچاغين كوت اولماسيندان. ايكي دفه دال­بادال چكندن سونرا  دا باش بدندن قوپموردو. من اولسايديم، چوخدان اودوم چاتلاميشدي. بلكه اونون دا اودو چاتلاييبدير. اؤيله اولسا ياخشي­ اولاردي، چونكي گؤرمزدي، آتام اللري­ايله قالانيني بير- بيريندن آييردي.

نبي قوربانين باشيني بير اوولانميش سئرچه باشي كيمي اوزدو. ساكين احوالي وار ايدي. سانكي هئچ بير شئي اولماميشدي. يئره، دووارا، اطرافا، حتتا اوزونه سپه­له­نن قان دا اونو سارسيتماميشدي. تورباني زئرزمي­نين ديب بوجاغيندان تاپدي. آغزيني باغلامايا چاليشدي. ايپ تاپابيلمه­يينجه، توربانين آغزيني اللري ايله بير يئره ييغيب، گلين باشي­نين توري كيمين چوخلو چين وئريب، اوْوجونون ايچينده كيپ-كيپ توتدو و يولا دوشدو.

مطلبين آردي
+ يازيليبدير  91/06/26ساعات 15:2  محمد صبحدل   | 

 


 

قورولوش موعاصير اینسانین اساس مشغله‌ سی‌دیر. یعنی کی؛ موعاصر اینسان پیس پرئزیدئنتی یاخشی کرالدان اوستون توتور.  بو اوستون توتما؛ ایکی سیستئمده، ایکی قورولوش و ایکی کونستراکسیانین(=شالوده ­نین) فرقلرینی بیر داها گؤز اؤنونده دایاندیریر. کراللیق قورولوشونا دایانان یازیچی (البتته بو کراللیغا اینانماق آنلامیندا دئییل)، سیياسی-ايجتماعی باخیمدان کراللیق علئیهینه اولسا دا عملده متن حؤزه‌سینده کراللیق ائتمه ‌یه باشلاییر. عونصورلره حاکيم اولور، نتیجه­ نی تعیین ائدیر و هر نه ­یه تصمیم توتما حاققینی ، اؤزونه عایيد بیلیر. بئله بیر یازیچی دئدیيیمیز کیمی نه قدر آزادلیق اوغروندا چالیشسا دا، عملده کراللیق سیستئمینه دایانیب، ایشی­نین قورولوشو ایله کراللیقدان مودافيعه ائدیر. یعنی اؤزو اثری­نین مضمونو اوسته دایانارسا دا، اصلده اثری­نین قورولوشو ایله دانیشیر. اثرین قورولوش ایله دانیشماسی موعاصير پوئتیکانین اساس تاپینتی­‌ لاریندان ساییلا بیلر. اصلده بیز قورولوش-مضمون ایکی‌ لیيی اوزره دایانمیریق، لاکین بو تاپینتی حقیقتین اؤنملی بیر پارچاسینی اؤزو ایله داشییان بیر فاکت ‌دیر. موعاصير یارادیجی بو پوئتیکایا دایانماق اوزره آنتی‌ کراللیق ائتمه‌ یه چالیشیر. بئله بیر قونومدا دونیا قطعيیت ‌دن دوشمه ‌یه باشلاییر و هئچ نه­ یه موطلق اینانماق و هئچ نه­ یی موطلق دانماق ایمکانی قالمیر. ووجودلار هامیسی اؤز سس ‌لری ایله، اؤز نفس‌ لری ایله، اؤز منطیق‌ لری ایله حاقلی‌ دیرلار (سوفیست‌ لرین ايستيثنالار منطیقی آدلاندیردیقلاری تئزی خاطیرلاماق اولار. اونلار «ايستيثنا آنا قایدانی پوزماز» دئیه ­ن ‌لره: «دوغرودور! اما ايستيثنا آنا قایدایا تابئع ده دئییل» دئییردیلر).

بئله بیر وضعييتده متن عونصورلر اوچون آزاد دئموکراتیک بیر آتموسفئره چئوریلمه‌ یه جان آتمادا، «اثر» اولدوغوندان «متن» اولما ماهیيتینی قازانیر. متن دونیا متن‌ لری آراسیندا بیر متن ‌دیر و اؤز ایچینده ده خئیلک ووجودلاری یئرلشدیره بیلر. بؤلونه بیلر، ترکیبه گیره بیلر، آمما موستقیل وارلیغا مالیک ‌دیر.

ادبييات یارادیجیلیغیندا اؤنجوللوک (آوانقاردچیلیق) آزادلیغا دوغرو بیر موباریزه‌ دیر (اساسدا یارادیجیلیق بئله بیر شئی‌دیر). ایجتیماعین گوج عونصورلری؛ موشخخص آنلاملار، موعیین تئکنیک‌لر، بللی فورما‌لار و آشکار اولموش ادبی داورانیشلارا تأکید ائدیب، ایدئولوژیک، نوستالوژیک و س. مضمونا عاييد مؤوضئع‌ لر اوزره، دلالت پروسه ­سی­نین «مدلول»لارینا دایانسا‌لار دا، اؤنجوللوک؛ «دالل» ایله «مدلول» آراسیندا اولان منطیقی و ایستانداردلاشمیش رابیطه ­نی پوزور و بو ایش­له یئنی بیر رابیطه­ نین یارانما تملی­نی قویور. بو یئنی رابيطه؛ یئنی دلالت نورماسی یارادیب، «دالل»ی «مدلول»دان اوستون توتور.

سؤزون ساده ­سی بو کی؛ جيدی یارادیجی، یئنی ترکیب، یئنی تئکنیک، یئنی فورما و حتتا یئنی قرامماتیکا یاراتماقلا، بو موناسیبت‌لری پوزمایا جان آتیر. متن؛ دیلین اساس قرامماتیکاسینا دایانسا دا اؤز اؤزللیيینده و اؤزلويونده، اؤز قرامماتیکاسینی تاپیر. بو حتتا ان موقددس دئسپوتیزم یعنی دیلین مئعیار قرامماتیکاسی اؤنونده ده عوصیان بایراغی قالدیرماق دئمک ‌دیر.

بو باخیمدان واختلی واختیندا یئنی اولان بیر تئکنیک ده، ایلک ایشلمینده ماهیيتجه آنتی‌کراللیغا دایانسا دا، آوتوماتلاشدیریلدیقدا یئنی بیر کراللیغا چئوریلیر. سؤزون آچیغی بو کی؛ تئکنیکی اؤیره ­شمک اولار، اونو تقلید ده ائتمک اولار، لاکین اونون ماهيیت و دالیندا دایانان پوئتیک تفککور اؤیره­ نیلمه­ سه، متن؛ ایصالت­لی بیر ووجودا چئوریلمه ‌یه‌ جک. بو آرخادا دایانان پوئتیک تفککور؛ یارادیجی اوچون، تئکنیک‌ لره (متنین طلباتینا اویغون) یئنی ایجرا‌لار یولو تاپماق و حتتا یئنی تئکنیک‌لر الده ائتمک و یارادیجیلیق ایمکانلارینی آرتیرما قابیليیتی گتیرن یئگانه ووجوددور. اونوتمایالیم کی؛ هر یئنی تئکنیکین ماهييتی،  عوموما آشکارلاناندا کلیشه­ یه چئوریله بیلر. متنین ده حتتا پولی­فونیک­لیيی­نی ماهيیتجه یوخ، بلکه بللی اولموش (مودا چئوریلمیش) تئکنیک‌لرده گؤره ­رسک، بیز ده، کراللیق-دئسپوتیزم موبللیغی کیمی متنین ایچ سسلرینی بوغماغا باشلایاجاغیق. مخلص بو کی؛ تئکنیک متنین اؤزوندن، ایسته ­ییندن قایناماسا متنده قوندارما بیر ووجود کیمی باشقا ووجودلارین حاقلارینی دوشونمکده چتین‌لییه دوشه­ جکدیر. متنده ادبی مودلارا باخا‌راق تئکنیک ایشلتمک اولماز. آمما پوئتیکانین هر تأکیدینه ماهييتجه یاناشساق، یئنی یوللار تاپما قابيلييتی­ له ادبيياتین اینکیشافی اوغروندا آددیم آتا بیله ­جه ­ییک.

بورایا کیمی بحث عومومی و تئوریک دانیشیقدا کئچیر. عملده:«عوموم دیلداشلاریمیز و حتتا یازیچی‌لاریمیزین دیلین قرامماتیکاسینی باجارمایان یئرده، نئجه نحو پوزغونلوغوندان و قرامماتیکا دئسپوتیزمی­نین علئیهینه عوصيان بایراغی قالدیرماق اولار؟» دئیه ­ن‌لر ده واردیرلار. بو، عئینی بیر فاکت‌ دیر. چوخلو ضعیف تألیف‌لرین کؤکو قرامماتیک ساوادسیزلیغا دایانیر. اما بیز عومومی ساوادسیزلیغی باهانا ائدیب نه قدر ايستيثنا شراييطده یاشایا بیله­ ریک؟ ايستيثنا شراييطین، اونا اینانماقدان یارانماسینی، اونوتمامالی­ییق کی. دیلدن اونون قابيلييتینه ایناندیغیمیز قدر فایدالاناجاغیق. بس نئیله ­مک؟

ضعیف متن ایکی یؤنلو بیر پروبلئم تؤره ­‌دیر. بیری متنین اؤز ضعیف ‌لیيی و نتیجه­ ده ضعیف بیر ادبيياتین یارانماسی‌ دیر.(نثریمیزده داها آیدین‌ لیقلا گؤرونن پروبلئم.) بو، بیزیم آنا دیلیمیزده تحصیل آلمامادیغیمیز و ها بئله ایستاندارد متن‌ لره چتینلیکله ال تاپمامیزا قاییدیر و چوخ دا طبیعی بیر مؤعضل‌ دیر. بونون حللی اوچون آرتیق چالیشیب، اوخوماق و اؤیره ­شمک لازیمدیر. بو قونومدا بعضن اؤز قاپی‌ سیز قالا‌لاریمیزدان یئنیب، یئنی سس‌لره قاپی آچمالی­ییق. مئعیار دیلی اؤیره­ نمه­ لی­ يیک. حتتا دیالوقلاردا دا نئچه-سسلی‌لیک دئیه موختلیف لهجه-دئییلیش‌لره یاناشساق دا مئعيار دیلی دوشونمه فیلتئریندن کئچمه ­لی­ يیک.

پروبلئمین داها خطرلی اولان باشقا یؤنو؛ قرامماتیکا کیتابی اوخوماقلا و بیر آز نحوی ساوادلا ائديت آدینا بدیعی متن‌لرین جانینا دوشمک‌دیر. مطبوعات و نشر ایمکانلاری‌نین آزلیغینی نظرده توتارساق بو ائدیت‌لرین نه درجه­ ده یازیچی‌لاریمیزا تحمیل اولونماسینا دوشونه بیله ­ریک. ائدیتور پوئتیکانی دریندن اؤیره ­نمه­ لی‌دیر. بونو اؤیره ­نمه ­سه متنده هر بیر، قورو دیل قرامماتیکاسینا اویغون اولمایان بدیعی داورانیشا، «سهو» آدی وئریب، مطبوعات و نشر ایمکانلاریمیزین قیتلیغیندا، ادبيياتین فعال اینکیشافی اؤنونده انگل اولا‌جاقدیر. دئمک اولار کی؛ تکجه پوئتیک مئتودو ایله «سهو»ی، «عمد»دن آییرا بیلمک مومکوندور.

اؤرنک اوچون ج.جویس «فینیگینین یاس گئجه­‌لری» اثرینین سون فصلینده ایکی پالتار یویان قادینین صؤحبتینی گتیریر. بو ایکی قادین عئینی حالدا داش و قاراغاج و هابئله اؤلوم و یاشاییش اولما‌لارینی دا گؤز اؤنونده ساخلاییرلار. رومانین بو سطرلرینده؛ قادینلارین دانیشیقلاری‌نین، سویون آخماسی‌نین، پالتارین یویولماسی‌نین و س. سس‌لری بیرلیکده ائشیتمک اولور. متن چوخ گؤزل آمما نحوی باخیمدان کامیللیک­له غلط­‌دیر. بو سطرلرین ائدیتینه فقط پوئتیکا ایله یاناشی و اثرین عمدی یانلیشلاری‌نین ماهييتینی دوشونمک شرطی ایله، ال آپارماق اولار. کوللیتده دئمک اولار کی؛ بدیعی متنین ائدیتینه دیل قرامماتیکاسی ایله یوخ، بلکه پوئتیکا قرامماتیکاسی ایله یاناشماق گرکلی‌دیر. بو اونو دئمک‌دیر کی؛ دیل و ادبيياتین اینکیشافی ماهييتده بیر پروژه یوخ  بلکه بیر پروسه­‌دیر و پروسه­ نی هیدایت ائتمک اولماز. اوندا تکجه ایشتیراک ائتمک اولار و اولسون کی بو ایشتیراک ان گوجلو، ان ائتکی‌لی ایشتیراک اولسون. آمما دیله بیر پروژه کیمی باخیب اونا تصمیم توتوب، اونو هیدایت ائتمه؛ تاریخ دیالئکتیکینی و دیلین آخیملی بیر ووجود اولدوغونو دوشونمه ­مک‌ دیر.

اورمو – قیش 1386

2008

 

 

+ يازيليبدير  91/06/15ساعات 23:34  محمد صبحدل   | 

  ـ بيزيم تحکييه ادبيياتيميز، شرق ادبيياتي­نين دامغاسي آلنيندا ايکن دونيايا سؤيله­ يه بيله ­جک هانسي سؤزلري اورتايا قويماقدادير؟  

:باخين! تحكييه ادبيياتي، چوخ جهتلي، نئچه قاتلي و اينسان درين­ليك­لري­نين ال چاتماز يئرلرينده سئير ائده بيلن بير فئنومئن­دير. بو سؤزله، بو اؤزللييي صنعت (هنر) و يا ادبيياتين باشقا ‍ژانرلاريندان آلماق ايسته ­ميرم. بير شاعير كيمي، شئعرده ده، بو اؤزللييين اولماسينا اينانيرام. آنجاق بو خصيصه­ لر، ائپيك ادبيياتدا داها اؤزل يئر توتور. بير يئرده تحكييه­ ني اينسان روحوندا آرديجيل بير آختاريش آدلانديرميشديم. هله ده بئله دوشونورم و تحكييه تحوولاتيني اينسان فئنومئنينه اولان باخيش­لارين نئجه ­ليك­لرينده ايزله مه­ يي اساس توتورام. بو اونو دئمك­دير كي؛ بيزيم دونيايا، اونون قورولوشونا و بو قورولوش­لارين يئگانه آلينما عاميلي يعني اينسانا و داها عئيني دانيشساق، اينسان شوعورونا موناسيبتيميز نئجه­ ديرسه، تحكييه­ ميزين جينسي ده عئيني جينسدن اولاجاقدير. بو سؤزون تصديقينده بوتون كلاسيك تحكييه­ ميز، مودئرن تحكييه­ ميز، فولكلوروموز و بديعي متن­لريميز دايانير. آذربايجان مودئرن تحكييه ادبيياتي­نين كؤك­لري اون­ دوققوزونجو عصرده باغلانسا دا، مودئرن تحكييه­ نين كؤك­لري غربده دايانير. يعني بيز، غرب مدنييتي، تاريخي و ضرورت­لريندن سؤز آچماميش، روماندان، پووئستدن، حيكايه ­دن و حتتا دراماتورگييانين اوچ اساسي قولو؛ فاجيعه، درام و كومئدييادان دانيشا بيلمه ­ريك. آمما هر حالدا، بو تحكييه ­نين بيزيمكي اولماسي و بيزيم دامغايلا تانينماسي دانيلمازدير. غرب تحكييه ­سي شرق مدنييتي ايله ديالئكتيكه گيريشميشدير. (سؤزوموزون تحكييه اوزره گئتمه ­سي اوچون صيرف تحكييه ­دن دانيشيرام.) «خورخه لوئيس بورخئس»ـي نظرده توتاق؛ اونون يازديغي ژانر، غربلي بير ژانر اولسا دا، ريوايتي­ نين جينسي شرقلي ­دير و يا خود «اورهان پاموك»ـون بوتون ايش­لري، اؤزلليك­له «منيم آديم قيرميزي» روماني، شرقلي بير ريوايت اولسا دا، غربي جينسي واردير. البتته بونا رومانين ايستانبولدا، يعني شرقله غربين آيريلديغي، عئيني حالدا دا ياپيشديغي يئرده يارانماسي، يئني توركييه ­نين غرب ايله موناسيبتلري و يوزلرجه آيري آيري عاميل­لرله ده داها دقيق ياناشماق اولار. سؤز خاص اثر اوزره دئييل. غرب ريوايته دقيق­ليك، عئيني­ ليك و اوبراز درين­لييينه دالماق ايمكان­لاريني گتيرسه­ ده، شرق ريوايتدن حظ آلما يول­لاري و ريوايت قات­لاري آراسيندا سئحيرلي و ايشراقي بير آتموسفئرين نئجه يارانا بيلمه سيررلريني تاپميشدير.  بورادا شرق و غرب دئديييميز سؤزلر، جوغرافييا اوزره دئييل، مدنييت اوزره آنلام داشييير. يعني آفريقاني دا، آسيياني دا، گونئي آمئريكاني دا و حتتا آمئريكانين قيزيل­ دري­ لري­ نين اسكي مدنييتيني ده شرقلي سايماق اولار. البتته اونلاردا غربلي ايزلري ده بولماق چوخ چتين دئييل. مسله همان «نيچه»­نين «تراژدي دوغوشو» آدلي اثرينده دئدييي «دئونيزوسي» روحون «آپولويي» روح ايله اوزلشمه­ سي­ دير. غربين «آپولويي» روحو، شرقين دئونيزوسي روحويلا تركيبه گيريشيب، بوگونكو اينسانين مدنييتيني يارادير. سؤزون دوغروسو بو كي؛ بيز داها هئچ ­واخت خاليص شرقلي و يا خاليص غربلي اولا بيلمه­ يه­ جه­ ييك. نه بيز، بلكه هئچ كيم دونيادا خاليص شرقلي و يا خاليص غربلي اولا بيلمه ­يه­ جك. بيزيم شرقلي كؤكوموز واردير و تحكييه تئكنيك­لريني ده بير شرقلي كيمي ائتکي­ لنديرميشيك. دونيادا خاص بير تحكييه يارانيب و من بونو «ايشراقي تحكييه» و رومانا گلديكده ايسه «ايشراقي رومان» آدلانديريرام. بلكه ­ده، داها دوزو «تحكييه ­ده ايشراقي ­ليك» دئمك­دير.  

ـ رومان اؤز يئني آنلاميندا، باتي­ دا «دون کيشوت»ـلا دوغولور... دوغويا گلديکده ايسه بو ژانر يوز ايلليک­ لرله گئجيکديکدن سونرا، يازيلماغا باشلايير. آذربايجانين چاغداش تحکييه ادبيياتي­ هاچاندان بَري باشلانميش­دير؟  

: آذربايجان مودئرن تحكييه ­چي­لييي غرب تحكييه ­چي­لييي آرديندا يارانير، غربلي ژانرلاري يئرلي خصيصه ­لرله تطبيق ائتمه ­يه چاليشير. (البتته بو اؤزو، عنعنوي ژانرلارين، يئني دؤور- يعني شرقين غرب ايله اوزلشمه دؤورو- طلبلرينه چاتيشمامازليغي نتيجه ­سينده ضرورت تاپير.) «آخوندزاده»­نين «آلدانميش كواكيب»ـيندن «كامال عبدوللا»نين «سئحربازلار دره ­سي»ـنه كيمي، بو پروسه ­ني ايزله­ مك اولار. البتته بيز مسله ­ني دوشونمك اوچون، اونون رنگ­لريني غليظلنديريريك. مسله­ نين غيلظتي، موختليف زامان­لاردا فرق ائدير و بيزيم ياناشما جهتيميز آيري يؤن­لردن ياناشماق قابيلييت­لريني دانماق ايسته­ مير. «جليل ممدقولوزاده» حيكايه ژانريني يئرلي و دوغما بير ژانرا چئويرمكده چوخلو باشاري­ لار الده ائدير. اونون نثري­ نين اينكيشافي گئديشاتيني آراشديرمادا؛ روسيه، ايران، عوثمانلي و بوتون دونيا ده‌­ييشيك­ليك­لري­ نين و بو ده‌ييشيك­ليك­لرين، قافقاز و اؤزلليك­له آذربايجاندا اولان گئنيش ائتکي­ سيندن دانيشماغيميز گركلي­ دير. بو موناسيبتلره دقيق ياناشساق، آذربايجانين او زامان چوخلو مدني، سيياسي و ايجتيماعي ساحه ­لرده ايران، عوثمانلي و شرق اؤلكه­ لري آراسيندا اؤنجول بير رول اويناماسيني داها دقيق باشا دوشه بيله ريک. بو، ايراندا اؤزونو «مشروطه تحرروكاتي»ـندا و تبريز كيمي بير شهرين او چاغدا ايرانين ان مدني، ان اؤنجول بير شهري اولماق فورماسيندا گؤسترير. بحث چوخ جنبه ­لي و موفصصل­دير و بونلاري باجارديغيم قدر «ديليميز حيكايه­ ميز» آدلي بير كيتابدا آچماغا چاليشميشام. آمما سوروشدوغونوز مسله تاريخي حودود اوزره اولسا خانيميم «فاطيمه ميرحسن­پور»ون ايشتيراكي­لا حاضيرلاديغيميز «آذربايجان حيكايه ­لري» كيتابي­ نين بيرينجي جيلدينين اؤن­ سؤزونده گلديي كيمي؛ بديعي نثرين ائعتيبارن 1830-دان يئني بير مرحله­ يه گيرديييني عونوان ائتمك اولار. «باكي خان­ اوو قودسي»­نين «كيتاب-ئ عسگرييه»سي، «قوتقاشينلي»­نين «رشيد به­ ي و سعادت خانيم»ي و آخوندزاده ­نين «آلدانميش كواكيب»ي. بونلارين هره ­سي اؤز نؤوعونده باشلانغيج­دير. آمما پوئتيكا تاريخي حودوددان باشقا مسله ­لري ده نظرده توتور. 

ـ چوخ­لارينا گؤره، جليل ممدقولوزاده ­نين ياراديجيليغي چاغداش حيکايه ادبيياتيميزين تمل داشي کيمي سانيلير. اونون يازي­لارينداکي ديل اؤزلليک­لريندن دولايي، ايندي ده، حيکايه­ لريني چئشيدلي اوخوجولارين قارشيسينا قويدوغوموزدا، اونلارين دوغما بير ديلده اثر اوخودوق­لاريني ائشيديريک...   

: «جليل ممدقولوزاده»­نين آذربايجان حيكايه ژانرينا گتيردييي ايمكان­لار چوخ حياتي ايدي. «فيوضات­چي­»ـلارين گئنيش تبليغات آپارديق­لاري فضادا و آذربايجان ادبيياتيني عوثمانلي ادبيياتييلا بيرگه تورك ادبيياتي قولو سايماق يئرينه، آذربايجان ادبيياتيني عوثمانلي ادبيياتي­ نين بير قولو كيمي گؤسترمكده اولدوق­لاري بير زاماندا، «جليل ممدقولوزاده» يئرلي ديل، يئرلي تيپ و اوبرازلار يارادير. بو ديل، اولدوقجا موقددماتي بير ديل­دير. خالق دانيشيغينا ياخين­دير و توركجه يازي­ ساوادي اولمايان­لار اوچون دوغمادير. يعني يازي ديليندن آرتيق ائشيتمه ديلينه ياخين­دير و بو اوزدن كوتله ايستيقباليني قازانير. كوتله، ديلي دوشونور، اوبرازلاري تانييير و ژانرين يابانجي اولدوغونو اونودور. يعني ژانر دوغمالاشير و «جليل ممدقولوزاده­»ـدن سونرا، سانكي آذربايجانلي مذاقينا ان دوغما، ان اويغون ژانرلاردان بيري حيكايه­ دير. «پوست قوطوسو» حيكايه­ سينده، «نوروزعلي» اوبرازي عئيني حالدا شرق كؤكلو آذربايجانلي كوتله تيپي­ نين نوماينده ­سي­ دير. بو اوبراز، چوخ جيددي وجهله آذربايجانلي­ نين ايييرمينجي عصرين اوولينده اولدوغو دورومو آيدينلاشديرير. «ولي­ خان»­ خانليغينا باخماياراق، خانليقدان اؤنجه آذربايجان ضياليسي كيمي گؤستريلير. چوخ دا ظاليم و غددار دئييل آمما، بير ضيالي ريسالتيني اؤده ­مكده چوخ گوج­سوزدور. «نوروزعلي­»ـني آيدينلاتمادان اؤنجه، اونو يئني بير فئنومئنين اؤنونه يوللايير (بلكه ­ده، اونون داها اؤنملي مشغله ­لري واردير) و «نوروزعلي» بو يئني فئنومئن­ له اوزلشمه­ ده، اوخوجونون ذئهنينده آجي بير گولوش تؤره ­دير. «نوروزعلي­»نين بو حيات آجي­لاري آراسيندا اؤزونو تاپما پروسه­ سي و گاهدان پريميتيو قضاوت­لري آذربايجانلي­ نين ايييرمينجي عصرين اوول­لريندن باشلانان تقديريني گؤسترير. آذربايجانين هر ايكي تاييندا (قوزئيلي،گونئيلي) ايل­لرله «نوروزعلي ­ليك»[1] ياشايير. «نوروزعلي­ ليك» حيكايه ­نين ماجراسيندا دا، ديلينده ده، فورماسيندا دا و حتتا «جليل ممدقولوزاده»­نين ياراديجيليغيندا دا واردير. بو اونو دئمكدير كي :

الف ـ آذربايجانين ايلك كاميل حيكايه­ سي، عنعنوي ريوايت تئكنيك­لريندن اوز چئويرسه ­ده، يئني تئكنيك­لرين يئرلي ايجراسيني باجارميش­دير.

ب ـ «جليل ممدقولوزاده»­نين و آذربايجان ايلك مودئرن تحكييه­ چي­لري­ نين ياراديجيليغيندا، «نوروزعلي ­ليك» اولسا دا، بو نوروزعلي­ لييه بير ووقوف دا واردير.

مودئرن تحكييه ژانرلاري­ اسكي ژانرلارلا ديالئكتيكه اساسلانمادا فرقله ­نير. بيز بورادا، تحكييه ديلي­نين ديالئكتيكي اينكيشافيني و نتيجه­ ده ديناميك تحكييه ديلي­ نين يارانماسيني گؤروروك. ايراندا ايل­لرله ديل سيخينتي ­سي چكن و ايجتيماعي ايره ­لي­له­ ييشي­ نين قاباغي آلينان خالقين ديلينده نيسبي وضعييتده پريميتيوليك اولدوغو اوچون، «جليل ممدقولوزاده»­نين نثري هله­ ده سئويلير و حتتا توركجه اوخويوب يازماق باجارمايان­لار دا، بو نثردن ذؤوق آليب اونو دوشونورلر. بيز، بونو، دفه ­لرله «بوتا» يازيچي­لار اوجاغيندا قورولان كيلاس­لاريميزدا سيناييب و هر دفه عئيني نتيجه­ ني الده ائتديك. ساوادسيز ياشلي ­لاريميز بو حيكايه ­لري داها آرتيق سئويرديلر. 

ـ «جليل ممدقولوزاده»نين پريميتيو ديليندن دانيشديق. ها بئله اونون چاغداش حيکايه يازماسينا دا اينانيريق. بو ايکي سؤزو بير بيري­ نين يانينا قويدوغوموزدا، بير نؤوع اويغون­سوزلوغو دويماق اولور. بو چاتيشمامازليغين هاچانا کيمي آردي اولاجاق­دير؟ (و يا اولموشدور؟!) 

«هئگئل»ـ­جه، اسكي يونانيستانين دورغون قياسي-ايستيقرايي فلسفه­ سينده، حركت عاميلي نظرده توتولماميشدي. حركت عاميليني ايسه بو فلسفه­ ده سيغيشديرماق چوخ چتين ايدي. «هئگئل» محض بو بوشلوغو دولدورماق اوچون ديالئكتيك فلسفه ­سيني اورتايا چكدي و همين، چوخلو فئنومئن­لرين حركتدن يارانان ده‌­ ييشيك­ليك­لريني آچيقلامايا ايمكان ياراتدي. پريميتيو ديل­له اولسا دا، مودئرن تحكييه صاحيبي اولان ادبييات، داها پريميتيو قالا بيلمزدي. مودئرن­ليك اؤزويله آرديجيل يئني­لنمه دَبيني گتيرميشدي. ديل فني اينكيشافا دوغرو يول آچمالي ­ايدي. ايجتيماعي ايمكان­لار گئنيش­لَنمه­ لي ايدي. «ريضا براهني» دئميشكن ايجتيماعي ايمكان­لار اولمايان يئرده يازماق خوصوصي بير پروسه­ يه چئوريلير. لاكين تحكييه ان پريميتيو دؤورلرينده ­ده، بئله خوصوصي قالا بيلمه­ ميشدي. تحكييه جمعييت صنعتي ايدي. ايران آذربايجاني ­نين ادبيياتينا باخين! شئعرين اينكيشافي نثره گؤره داها آرتيق اولموشدور. بو شئعرين فردي فضالاردا و اينزيوادا ياشايا بيله­ جه ­يي قابيليييتينه قاييدير. نثر؛ ژورناليستيكا طلب ائديردي، ساوادلي اوخوجو طلب ائديردي و  بو؛ مدني سيخينتي فضاسيندا يارانا بيلمزدي. محض بونا گؤره­ ده، مدني سيخينتي سينيرلاريني سينديران يازارلار، اؤز ميللت­لري­ نين ان اؤنملي يازارلارينا چئوريليرلر. اؤرنك اوچون آذربايجان ادبيياتيندا چوخلو يئني موترققي يازارلار اولسالار دا و دونيا حتتا بو يازارلارين متن­لرينه ماراق گؤسترسه ­ده، «آخونداوو» و يا «جليل ممدقولوزاده»­نين يازديغي نيسبتن پريميتيو اثرلرينه كؤلگه سالماق مومكون دئييل. داها عئيني­ سي بيزيم «گنجعلي صباحي»ـ­ميز؛ دونيا ميقياس­لارينا گؤره ضعيف يازار ساييلسلدا و اثرلرينده فني و پوئتيك چاتشمامازليق­لار اولسا دا، يعني دونيا اونون يازديق­لارينا ائعتيناسيز باخسا دا، بيز اونو ان بؤيوك يازارلاريميزدان ساييب، اونا حؤرمت ائده ­جه­ ييك. «گنجعلي صباحي» خوصوصي بير پروسه­ ني عومومي ذاتينا قايتارا بيلن يازيچي­لار نسليندن­دير. بو نسيل ايدديعاسيزدير. ايشي اؤز يازيچيليغي تثبيتي اوچون يوخ، بير ميللتين ادبيياتي­ نين عومومي اينكيشافي اوچون گؤرور. سونراكي بؤيوك يازارلار، ايليك ­لرينه قدَر بو نسيله بورجلو اولاجاقلار. بلكه بيزيم نسيل يازارلارين دا تقديري بئله اولدو. سؤز تحكييه­ نين ايجتيماعي بير پروسه اولماسيندان گئديردي. پريميتيوليك آرخادا قالمالي ايدي.

  ـ تاريخ باخيميندان، «جليل ممدقولوزاده»­ دؤوروندن سونرا، هانسي يازيچي­لار آذربايجان تحکييه ديلي­نين گليشمه­ سينده اؤنملي رول اويناميشديلار؟ 

: 1937-1938 -جي ايل­لرينده آپاريلان سيياسي ايجتيماعي تضييق­لر، آذربايجان ادبيياتيندا فاجيعه­ لر ياراتدي. البتته بو، صيرف آذربايجانا دا عاييد دئييلدي. بؤيوك و ده‌­ يرلي ضيالي­لاريميز بيربير گولل‍ه­ له­ نيب و يا سورگونه گئتديلر. 1918-1920 -جي جمهورييتينده يارانان غورور، بوغولوب اَزيلمه­ لي ايدي. ايختيناق و امنييتي فضا تكجه بويرولموش ادبيياتا فعالييت ايمكاني وئريردي. آذربايجان سووئت ادبيياتي بو دورومدا ياراندي. چوخ­لاري سووئت ادبيياتي ­نين قوروجولاريني، ايختيناقين ضيالي­لاريميزلا ائتديكلريني توجيه ائتمه مؤوضعينده، قيناييب سوچلاييرلار. آنجاق بو؛ ديلين رسمي فعالييتيني قورويوب، اونون اينكيشافيني داوام ائتمه­ ده اساس رول اويناميشدي. ايختيناق فضاسيندا، يازارلار حاضيركي زامان و مكاندان باشقا زامان و مكان­لاردا اولان سوژئت­لري داها تهلوكه­ سيز ساييرديلار. البته بويرولموش ادبيياتدا يازماق دا، يازيچي نين پئشه­ كار فعالييتي ­نين تضميني دئمك ايدي. سووئت يازيچي­لاري ايدئولوژيك باخيشين ايستيلاسيني نظرده توتاراق، سوژئت باخيميندان محدود فضالاردا يازسالار دا، ديلده و ديلي پريميتيوليكدن قورتارماقدا اساس رول اويناميشلار. ميثال اولاراق، «مئهدي حوسئين­»ـين اثرلرينه باخا بيله ­ريك. بورادا ديل اينكيشاف ائتميشدير. تحكييه ­ده؛ آتالار سؤزلري، مزه ­لي دئييم­لر و خالقين عومومي طنز روحيه­ سيندن آرتيق، اوبرازلارين و ماجرانين جيددي-ديالئكتيكي تحليلينه گيريشمه واردير. بو جيددي-ديالئكتيكي تحليل، ايدئولوژيك و ايدئاليزه اولسا دا، اؤز جيددي ديليني طلب ائتديييندن، ديلين اينكيشافيندا اؤنملي رول اويناميشدير. بو اينكيشاف، بيردن اوز وئرمه­ ميش­دير، و اساسن آذربايجان ادبيياتيندا بيردن ­لييه آز راستلاشيريق. هر نه اؤز ريوال و منطيقي جرياني ايله آخير. اينقلاب دا، دئوريلمه ­ده، مودئرن­ليك ده. بونون اساس عاميلي باياق دئديييم او نوروزعلي­ لييه اولان ووقوفدان آسيلي­دير. نوروزعلي­ لييي­نه واقيف اولان، «نوروزعلي­ ليك»ـده قالماياجاق و اوندان اؤتدوكدن سونرا دا، اونا ساري گئريله­ مييه­­ جك­دير. آيدينلاشديرماق اوچون، مثلن «صادق هدايت»ـده «بوف كور» كيمي بير اثر ياراناندان سونرا، يازيچي نه يازير؟ «حاجي آغا». «حاجي آغا» هم پوئتيك باخيميندان، هم ده نثر نئجه لييي باخيميندان يازارين سقوطودور. بو گئريله­ مه نه ­دن اوز وئرميشدير؟ فارسجانين چوخ گنج اولان مودئرن تحكييه­ چي­لييينده «بوف كور» يئني و سابيقه­ سيزدير. يعني موترققي اولماسيني گؤسترمه­ يه چاليشير، آنجاق بو موترققي­ليك، «ريضا شاه»ين گؤستردييي مودئرنيته كيمي ابتر و كؤك­سوزدور. اثرده مودئرنيته­ ذاتدان آرتيق، مودئرنيته ­نين ايلك باخيشدا(يعني قابيغيندا) گؤرونن عئيني نتيجه ­لري گؤرونور. مودئرنيته «هدايت» اوچون وحي كيمي بير شئي­ دير، سانكي «موسا» «طور»ـدان ائنيب تانري­ نين اون بويوروغونو اوخويور. بو حقيقت­دير، ائشيت و داليجا گئت. هاردان حقيقت اولدوغو دا سنه دخلي يوخدور. بو سؤز، انرژيسي­ني «موسا»دان يوخ، وحي ائدن تانري­دان آلير. اساس گوجو ده، او وحي ائدن تانري­ نين موبهم­ لييينده ­دير. «بوف كور»ـون اساس ده‌­ يه رلري اونون غربلي قايناق­لاريندادير. «هدايت»ـين ارتيدادي كلاسيك فاناتيك­ليك جينسيندن ­دير. تفككورون ظاهيري ده‌­ ييشسه ­ده، قورولوشو ده ‌­ييشمه­ ييب. هئچ نه باش وئرمه­ ييب. اينام آنلامي كلاسيك­دير. آدام­لار رنگ ده ‌­ييشسه­ لر ده، هئچ بير ده‌­ ييشيك­لييه اوغراماميشلار. «جليل ممدقولوزاده»ـ­دن «مئهدي حوسئين»ـه قدَر اوزون بير يول وار. «نريمان نريمان­ اوو»، «عبدوالرحيم حق­وئردي­ يئو»، «ثاني آخونداوو»، «عبدوللا شاييق» و باشقالاري. بونلاردا پريميتيوليك واردير. البتته «شاييق»ـ­ده گئتديكجه نثر فورمالاشماسي دا واردير. آمما عومومي خوصوصييتلره گؤره، «جليل ممدقولوزاده» ايله بير سيرادا يئرلشه بيلرلر. ديل اينكيشافي باخيميندان «جعفر جاببارلي»، «مئهدي حوسئين»ـ­دن اؤنجه­ده دايانير. يعني ايلك پريميتيو نثر يازارلاري ايله، «مئهدي حوسئين» نسلي­نين دوز اورتاسيندا. «جاببارلي» رومانتيك بير آتموسفرده سوسياليست بير ادبيياتا دايانماقلا، ايلك نسلين اينتيقادي-ايجتيماعي-ضيالي ادبيياتي ايله فرقله ­نير. يعني عومومي اينتيقادي فضادان رومانتيك-سوسياليستي بير فضايا كئچمه­ يه و سووئت ادبيياتيني ياراتمايا جان آتير. ديلي ايسه اينكيشاف ائديب، لاكين هله «مئهدي حوسئين»ـين زامان ايستک­لرينه جاواب وئره بيلن اينكيشاف ائتميش ديلي ايله چوخ فاصيله­ ده دايانير. سووئت ادبيياتي، آيري ديل­لرده هئچ نه الده ائده بيلمه­ سه ­ده، آذربايجان كيمي موستقيل اولمايان بير اؤلكه ­ده نيسبي ديل اينكيشافي گتيردي. «ميرجلال پاشايئو»، «ايلياس افندي­يئو»، «ميرزه ايبراهيم ­اوو» و باشقالاري ­نين نثري موعاصير زامانين ايستک­لرينه اويغون بير نثردير. يعني ديققت ائتمه ­لي­ييك كي؛ آذربايجان تحكييه نثري­ نين پروبلئم­لري، مثلن دونيا ميقياسلي يازارلار يئتيرميش و فورماليست­لر كيمي چوخ آكتيو يئرلي پوئتيكا يارادانلاري اولان؛ روس ادبيياتي پروبلئم­لري­له عئيني دئييل.

 ـ بونلارين هاميسي دوزدور؛ آنجاق اوزون ايل­لر بويو سووئت حؤكومتي­ نين ياراتديغي دوروم­لارا گؤره، چوخلو باجاريقلي يازيچي­لار رئاليزم سوسياليزم جيزيغيندان چيخا بيلمه ­ميشديلر... يعني بو جيزيقدان چيخماغا هئچ ايمکان­لاري دا اولماييب­دير.  

: ايدئولوژيك سيستئم­لرين آزاد ياراديجيليغا انگل اولدوق­لاريني دانماق ايسته­ ميرم. سؤز، باغلي فضادا ايمكان قدَر ديل­لري­ نين اينكيشافي اوغروندا چاليشان ده‌­ يرلي يازارلاردان گئدير. سووئت ادبيياتي ياراناندا، بيز، مثلن روس ادبيياتي ايله بير يئرده دئييلديك. آزجادان سونرا، هر ايكي ديله ياخين شراييط حاكيم اولسا دا، هئچ واخت عئيني شراييط حاكيم اولماياجاقدي. غرب ادبيياتچي­لاري دوغرو بير موضئعدن، بو ادبيياتي، ادبي ده ‌­يه رلري ايدئولوژيك آنلام­لارا قوربان وئرمه ­يينه گؤره، تنقيد آتشينه توتورلار. منجه بو سؤز بوتونلوك­له دوغرودور. آمما حق سؤزو دئمه ­يه حق آغيز گرك. يعني بو پوئتيك باخيشين داليندا سيياسي مككارتيزم اولمامالي ­دير. ايستالينيزم ايچَري­ دن چورويور، و بو چورومه­ پروسه ­سي­نين شهادتينه قالخان ادبييات، دونيانين ان نادير فضالاريندان و اينسان روحونون ان درين يارالاريندان بيريني ائشه­ له­ مه­ يه باشلايير. ايستالينيزم فئنومئني دونيا تاريخينده ان دهشتلي ايدئولوژيك سولطه ­لرين تمثيلچيسي­ دير. بورادا اينسانين اينسانليغي نين تاپدالانماسي­لا اوز اوزه دايانيريق. بو تاپدالانان اينسانليغين دايانيشي، ديره­ نيشي و داورانيشي ان درين، ان جيددي ياراديليشين ماتئريالي ­دير. بئله بير آتموسفئرده يارانان ادبيياتا نئجه خور باخماق اولار؟ «ايستالين»ـين اؤلومو بير موستبيد حاكيم اؤلومو يوخ، اينسانا عاييد ان اساس دوشونجه­ لرين قورولوشونو ده‌­ ييشن بير واقيعه ­دير. 1950-60 -جي ايل­لرده، «خروشوف»ـون آپارديغي ايصلاحات نتيجه ­سينده، سووئت اؤلكه­ لري ضيالي­لاري آراسيندا اساس ده‌­ ييشيك­ليك يارانير. البتته بو ايصلاحات اؤزو ايستالينيزم تئزيسي­ نين داخيلي آنتي ­تئزيسي اولاراق، دوشونولمه­ لي­ دير. آمما اولا بيلردي كي بئله اولماسين.

ـ ايكينجي دونيا ساواشيندان سونرا، دونيا سوييه­ سينده بؤيوك ادبي آخيم­لارين يارانماسينا دوغرو انرژيلي بير جهد وار. بو ادبي آخيم­لار، آذربايجان تحکييه ­چي­لييينده نئجه سسله ­نير؟  

: «عليشان اوغلو» بونلاري چوخ ده‌­ يرلي اولان «آذربايجان يئني نثري» كيتابيندا سادالاميشدير: فرانسادا «يئني رومان»، اينگلتره ­ده «حيددتلنميش جاوان­لار»، آلمانييادا«47-لر قروپو»، آمريكادا «دوشونجه ­لر آخيني» و... بونلاري ساواشدان بئزميش اينسانين پيرتلاشيق دونيادا آپارديغي آختاريش­لاريندا، «تجروبي تحكييه جريان­لاري» دا آدلانديرماق اولار. بو شراييطين بوتون دونيادا او جومله ­دن سووئت اؤلكه ­لرينده اساس ائتکي­ لر بوراخماسي طبيعي­دير. آمما سووئت اهالي­سي­ نين ادبي فعالييتي (و ها بئله بوتون دوشونجه­ يه عاييد اولان داورانيش­لاري) ايكينجي دونيا موحاريبه­ سيندن داها آغير اولان ايستالينيزم تجروبه ­سي آنتي ­تئزيسينده يارانمالي ايدي. ايصلاحات و ايجتيماعي ده ‌­ييشيك­ليك­لر بو ديالئكتيكانين سئنتئزي ايدي. اوزون سؤزون قيساسي بو كي، هر بير ايجتيماعي ده ‌­ييشيك­لييين آرخاسيندا بير دوشونجه ده‌­ ييشيك­لييي دايانير. بو دوشونجه ده‌ييشيك­لييي اؤزونو فلسفه ­ده، اينجه ­صنعت­ده و ادبيياتدا گؤسترير. اولوييتلر ده، شراييطه گؤره فرق ائدير. آمما عئيني «بير اينساني فاكت»ـين آرخاسيندا ذئهني «بير گوج» دايانمالي ­دير و صنعتين (صنعتكارا تأكيد ائتميرم) گيزلي ريسالت­لريندن بيري ده، ائله بو دوشونجه­ لر قورولوشونون فورمالاريني و نورمالاريني ده‌­ ييشمكدير (بعضن حتتا صنعتكار دا بيلمه ­دن آمما ايشينده صداقت گؤسترمه­ سي اوزره).

موحاريبه ­دن سونرا، دونيا ادبيياتيندا تجروبي رومان و كوللييت­ده تجروبي تحکييه ادبيياتي ياراندي. روس ادبيياتيندا «شهر و كند» نظريه­ سينه آرخالانان تحکييه ادبيياتيني دا بو سيرايا كئچمك اولار. لاكين ايستالينيزمين آرادان قالديريلماسي­ لا بؤيوك بير ذئهني ده‌­ ييشيك­ليك اورتايا چيخدي.

ـ بو ده‌ييشيکليک­لر سونوجوندا، هانسي آنلام­لارين قورولوشو داغيلماغا باشلادي؟ هئچ اولماسا، ان اؤنمليسي هانسي ايدي؟  

: منجه اينسان تعريفي ده‌­ ييشيلدي. چوخ­لاري «يئني نثر»ـين حودودونو سوسياليزم رئاليزمي­ نين قورتولماسيندان حئسابلاييرلار، آمما منجه اولا بيلردي كي ادبييات سوسياليزم رئاليزمدن قورتولسون لاكين اينسان قورولوشونا باخيشين جينسي ده­ ييشيلمه ­سين. يعني همين قورولوش آيري بير قيليقدا ياشاسين. يئني نثري دقيقن بو باخيشين ده‌­ ييشيلمه­ سيندن حئسابلامالي­ييق. «آنار»ين آغ ليمانيندان نئچه سطير اوخويورام. ديالوق­لار «تهمينه» ايله «زاور» آراسيندا گئدير و ايلك ديالوق دا «تهمينه»­نين ­دير:  

«

- هردن دوشونورم اؤزومو تانيميرام. نئجه اولدو كي، من بو آدم­لارلا اويوشدوم؟ اويوشدوم يوخ ائ، دوستلاشديم، مئهريبانلاشديم، عئيني­لشديم...

-نه اولار كي؟ دوستلاشميسان، دوستلاشميسان دا. دوستلاشماق به ­يم پيس ايش­دير؟

-دئميرم كي، پيس­دير. مسله اوندا دئييل. من اونلارا آليشديم. باشا دوشورسن، مئييل­لرينه، هوس­لرينه، سؤزلرينه، ظارافات­لارينا، عيباره ­لرينه. اؤزلري ­نين، آروادلاري ­نين، اوشاق­لاري نين آد گون­لرينه­ جن ازبر بيليرم. مؤوقع­لرينه ده بلدم، مجليس­لرينه ده، توستولارينا[2]، تامادالارينا[3]... اه!

-يعني بئله پيس آدام­لار­دير؟

-ائح، سن نه ياپيشميسان: پيس- پيس! هئچ نه باشا دوشمورسن. پيس آدام. ياخشي آدام!- اليني باشينا آپاردي، كوله­ يين داغيتديغي ساچ­لاريني سليقه ­يه سالماغا باشلادي،- دونيادا نه پيس آدام وار، نه ياخشي آدام. عؤمور ائله اوزون چكير كي، آنجاق پيس اولماغا، يا آنجاق ياخشي اولماغا هئچ كسين حؤوصله­ سي چاتمير. گؤرورسن بيري حياتي بويو گاه ياخشي، گاه پيس...»  (آغ ليمان-كؤچورولموش نوسخه-كؤچورن: نسرين شيرمحمدزاده) 

ان هاي-­كوي­لو ايجتيماعي سيياسي اولاي­لار، اينسان درين­لييينده تعريف­لرين و قورولوش نورمالاري­ نين يئريني ده ‌ييشديرمه­ سه، ابتر بير پروسه كيمي ناقيص قالمالي­ دير. ان آزي، بو، بيز گونئيلي ­لرين عئيني تجروبه­ ميزدير. «آدورنو»ـنون «موعاصير روماندا راوي­ نين شأني» عونوانلي مقاله­ سينه باخين لوطفن. باخيشيميز اينسانا، دونيايا ده‌­ييشيلديكجه، ريوايتيميزين جينسي ده ده‌­ ييشيلير. تئكنيك­لرين روحو دا فرق ائدير. آذربايجان يئني نثري بو ده ‌­ييشيك­لييي دوشونمكده، هئچ ­ده مثلن روس ادبيياتيندان گئري­ده دايانمير. بلكه ده سووئت اؤلكه ­لري ايچينده ان اؤنجول­لردن حئسابلانير. بو نسلين  ياراتديق­لاري اثرلر گاهدان دونيانين ان ده ‌­يرلي اثرلري سيراسينداديرلار. «چنگيز آييتماتوو»ـون يازيچي «آنار»ـين يئتميش ايللييي موناسيبتينه گؤره يازديغي يازي هله ده اينترنت دوشرگه­ سينده ياييملانماقدادير. 

ـ قاييداق «يئني نثر»ـين تاريخي سينيرلارينا.

  : قويون ياخين بير اؤرنك­له باشلاياق. ايل­لر اؤنجه، «احمد شاملو»، «غولامحوسئين ساعيدي»ـني «سئحيركار رئاليزمي»نين قوروجوسو بيليب، بو ساياق يازمانين «ماركئس»ـين آدينا قورتولماسيني «ساعيدي» حاققيندا بؤيوك بير ايجحاف ائعلام ائتدي. مسله ­ني بئله دوشونمكده، منجه بيرآز فاناتيك­ليك وار. «ساعيدي» يازان ايل­لرده، هم «ائلچين افندي­يئو»ـ­ين و هم «اکرم اه‌يليسلي»ـ­نين ياراديجيليغيندا سئحيركارليق واردير. دقيق دانيشساق «سئحيركار رئاليزمي»نين ايزلري ده واردير. او حيكايه ­لر و اونلارين چاپ تاريخ­لري الده ­دير. آيري ديل­لرده و اؤلكه­ لرده ده، تانيماديغيميز يازارلار طرفيندن بئله ايش­لرين گؤرولمه ­سيني ظن ائديرم. پس مسله كيمين اوول  يازيب يازماماسيندا دئييل. مسله يازيلان اثرله بو اوسلوبون وارليغيندان مودافيعه ائديب، اونو تثبيته يئتيرمكده­ دير. البته يازيلان ادبيياتين موقئعييتي مسله ­سي ده وار­دير. «ساعيدي»­نين اثرلري چوخ ياخشي نومونه­ لردير و منجه فارسجادا ان اسكلتلي حيكايه­ لرين نئچه­ سيني او يازيب­دير. آمما اونون اثرلري «سئحيركار رئاليزمي»نين ان اينكيشاف ائتميش نومونه ­لري دئييل. واريميزا دا، يوخوموزا دا، تحليل­ له ياناشمالي­ ييق و دئيه بيلرم كي؛ گونئيين اينديكي دوروموندا يوخوموزو آراشديريب، آناليز ائتمه ­ميز داها ضروري­ دير. يعني چيخينتي يوللاريميز بورادان دير. يئني نثرين حودودو موطلق دئييل. اساسن بيز حدودسوز ميللتيك و حودودسوز اولدوغوموز قدَر ده، حودودبازيق. جوغرافيادا، تاريخده، ديلده و باشقا مسله­ لرده. حدودبازليغيميزين اؤنملي بير حيصصه­ سي حدودسوزلوغوموزدان دوغور. محض بو حدودبازليقدان­دير كي، رومانيميزين جينسينده اوبرازلاردا قان رابيطه ­لري و قوهوملوق اساس يئر توتور. رومان آراشديرماسيندا قان رابيطه ­لره اساسلانان اؤلكه ­لرله (ميثال اولاراق روسيه)، بئله اولمايان­لار(ميثال اولاراق آمريكا) آراسيندا، تيپولوژيك فرق­لر واردير. بو مبحثين بو دانيشيقدا سيغماياجاغينا گؤره، ايزله­ ييجي­لري اطرافلي بحث­لر آپارديغيم «ديليميز حيكايه­ميز» آدلي كيتابينا حواله ائديرم[4].  

ـ هر حالدا بو قطعييت­سيز سينيردا ايزلري آختارماق دا مومكون­دور. ائله دئييل­مي؟ 

: نييه ائله ­دير! چوخ­لاري اونو «عيسا حوسئين­اوو»ـون «يانار اورك» اثريندن بيليرلر. بعضن اونو «عيسا حوسئين­اوو» و «ايسماييل شيخلي»­نين ياخين يئني ­ليك ­لريندن و 1950-جي ايل­لردن حئسابلاييرلار. دئمك 50-جي ايل­لرده يارانان نثر، 60-جي­لارين نائلييت­لرينه زمينه ياراتميشدير. 50-جي­لرين آذربايجان نثريني دونيا ميقياسلي پروبلئملره جاواب وئره بيله ­جك قابيلييتي ­نين يارانماسيندا، اساس رول­لاري واردير. اونلاري بير مرحله بيليرم. يئني نثره ساري گئديرلر. آمما هر حالدا بوتونلوك­له يئني نثر تعريفينده يئرلشميرلر. «آنار» يئني نثرين حودودونو «عيسا حوسئين­اوو»ون «تئلئقيرام» پووئستيندن بيلير[5].  «اه ‌يليسلي» ايسه بو پروسه­ ني «يانار اورك»ـدن باشلاسا دا، «آدام­لار و آغاج­لار» و «آغ ليمان»ـدا تاماملانميش حئساب ائدير. آذربايجانين «يئني نثر»ي 60-جي­لاردان باشلانسا دا، ان آزي اوچ نسلين ياراديجليغي ايله موشخخص اولور. سونراكي نسل­لره ­ده، اساس ائتکي ­لر بوراخير. بو نسلين يازارلارين سادالاماق ايسته ­ميرم آنجاق منجه ياراديجيليق­لاري­ نين ايستيثنا اولما ميقياسييلا «آنار»، «اكرم اه يليسلي»، «ائلچين افندي­يئو»، «روستم ايبراهيم ­به‌ي­ اوو» باشقالاريندان بير قات داها اوستده دورورلار. «آنار» شهر فضاسيندا و عادي اينسان­لارين ان پسيخولوژيك حال­لارينا يول آچيب غير­عادي­لييي تاپماق يول­لاريندا يئگانه اوستادلاردان­دير. «آنار»ـا فارسجانين بير روتبه­ لي يازارلاري ايچينده، موعاديل تاپماق اولماز. يعني بئله بير فضالاردا، يا اصلن يازماييب­لار، يا دا يازسالار گؤزه گلن دئييلميش. بئله بير فضالارا گيريشمه ­يين چوخ دا ساده اولماماغيني بيليرم. توركييه ادبيياتي­ نين او چاغيندا دا، «ياشار كامال»، «اورهان كامال» و باشقالاري ­نين تأثيري دؤورو و سولچولوق ايدئالچي­ليق دؤورلرينده ده. بئله حئسابلاماق اولار كي، آذربايجان ادبيياتي كمييت باخيميندان يوخ، آمما كئيفييت باخيميندان دانيشماغا سؤزو اولان ادبييات­لاردان­دير. اؤنجه­ لر، «مير جلال» تئوريك اولسا دا، تحكيه اوبرازلاري­ نين يعني سووئت تحكييه ­سينده يارانان ايدئاليست قهرمان­لارين ناقص­ليييندن دانيشسا دا، يئني نثر تأكيدله پراتيكجه ­سينه مسله ­يه ياناشميشدي. بو دؤنوم، ايران فارس ادبيياتيندا اولسا دا، دؤنوش مرحله ­سي كيمي و يا بئله بير تأكيدله اؤزونو گؤسترمه­ ميشدير. (فارسجادا، او دا، يالنيز نئچه ­سسلي ­ليك باخيميندان سون ايل­لرده بو مسله­ يه ياخينلاشميشلار. بونون بحثيني بورادا ائتميرم؛) ايرانين فارس ادبيياتيندا، هله ­ده، ايدئاليست پرينسيب­لر ادبي فضالاردا ياشايير. 

ـ بَس نييه آذربايجانين بو گنج آمما پارلاق يئني ادبيياتي، دونيادا، ياخين اؤلكه­ لرده، و حتتا ايراندا لازيمي قدَر تانينماميشدي؟  

: بونون چوخلو عاميلي واردير. ايراندا آوروپا ادبيياتي ائتکي­سي آلتيندا، پسيخولوژيك باخيميندان آوروپانين تأييد و يا ردديني گؤزله­ يه ن يازيچي­لارين و ژورناليزمين بير گؤزو اورادا گئدن تحليل­لره باخير. ايستالينيزم قالديريلسا دا، سووئت دؤولتي قاليردي و سويوق موحاريبه فضاسي و ايراندا اولان اؤزل فضا بو اثرلره منطقي باخماق ايذني وئرميردي. مككارتيزم آمئريكادا دئموكراتيك ماسكا وورسا دا، هله ايران كيمي اؤلكه ­لرده ياشاييردي. بونونلا بئله سووئت اؤلكه­ سيني ايدئال جننته چئويرن سولچولار، بو اؤلكه ­نين بويرولموش ادبيياتي ساييلمايان و يا ان آزي سوسياليست شوعارلارا دايانمايان ادبيياتيني گؤرمك بئله ايسته ­ميرديلر. سووئت­لر ايچريسينده گئدن ده‌­ ييشيك­ليك­لر هله ائشيكده ياييلماميشدي و او هئيبتي سينديرماق اولمازدي. ايستالينيزم سووئت­لرده ايفشا اولسا دا، بيز ائشيكده­ كي­ لر، ايل­لرله ايستالينيزمده ياشاديق. ادبي فضالاريميزدا گاهدان ايستالينيزمدن دؤنموش سولچولارين ايستالينيستي داورانيش­لاري قاليردي. غرب ايسه او دئديييم هئيبتي ييخماميش هئچ بير موثبت فئنومئني اونون ايچينده گؤرمك ايسته ­ميردي. بو سووئت اؤلكه ­لري­ نين ادبييات­لارينا فللئيي باخماغي، تعصوبلو سولچولار و تعصوبلو ساغچي­لار بيرگه يايميشلار.  

ـ بونا، «پهلوي» چاغيندا  آذربايجانلي­لارين قارشيسينا اولان مدني خور باخماق­لار، ياساق­ليق­لاري دا آرتيرماق اولارمي؟  

: قطعييتله... هله ده، بو ديلين آدي گلنده، اوز-گؤزلريني تورشالدان­لارين سايي آز دئييل. ساده­ جه ميثال اولاراق، عيراقلي كورد يازار «فرهاد پيربال»ـين اثرلري ايراندا «بايا»، «كارنامه» و نه بيليم هانسي ادبي پروفئسييونالليق ايدديعاسيندا اولان نشرييه ­لرينده دؤنه ­لرله ياييلماميشديرمي؟ «پيربال»ـين ده‌­يرلريني دانميرام. واختييله اونون «پته­ ته خوره ­كان» (يئرآلما يئيه ­ن­ لر) مجموعه­ سيندن گئدن ترجومه­ لرده ايشتيراك دا ائتميشم، آمما «پيربال»ـين او سطحده گئدن ايشلري ياييلان مطبوعاتدا، نييه مثلن «ائلچين افندي­يئو»ـين «ساري گلين» حيكايه­ سيندن بير ترجومه ياييلماسين؟ يئتميش ميليون نفوسلو بير اؤلکه ­نين رسمي ادبيياتيندا، منه بو اثرين ميقياسلارينا ياخينلاشا بيلن بير اثر گؤسترين! سؤز گيلئي­لَنمه و يا خود اعتيراض ائتمه­ ده دئييل. من دانيشسام دا، دانيشماسام دا، فاكت يئرينده­ دير. مسله بودور كي، گونوموزده ­کي ادبي فضالاردا، سيياسي- ايجتيماعي و بوتونلوك­له صيرف ادبي ده‌­ يه رلره دايانمايان داورانيش­لار چوخ گوجلودور. (سؤزوم فارسجا گئدن نشريه­ لرده ­دير.) غربده ده داورانيش­لارين بو جينسي گوجلودور. «نوبئل موكافاتي»ني، ايجتيماعي-ايستراتئژيك باخيميندان اؤنم داشيمايان و يا آز اؤنم داشييان هانسي اؤلكه ­نين ادبيياتي قازانا بيلميشدير؟! بير اثره ائعتينا ائتمك و يا ائعتينا ائتمه ­مه ­يين ادبي عاميل­لردن باشقا، آيري فاكت­لاري دا واردير و بيز ادبي تحليل­لريميزده اونلارين نه درجه ­ده بيزه ـ بيله ­رك و يا بيلمه­ دن ـ خط وئرمه­ لرينه دوشونمه­ ميز گرك­دير. نه اوچون من «آنار»ين ان گؤزل و ده ‌­يه رلي ايش­لريندن اولان «من، سن، او و تئلئفون» اثريني، گرَك فرانسيزجادان فارسجايا چئوريلميش نوسخه سيني اوخويام؟ («پروگرئس»ين آذريستان آدلي مجموعه­ سينده گئدن بير ترجومه­ ني ده سونرالار اوخودوم؛) پس منيم ضيالي­لاريم او قدَر رومان­لار، پييئس­لر و اثرلري آذربايجان توركجه ­سيندن فارسجايا چئويرَ­نده، نه اوچون بئله بير اثرلردن واز كئچميشلر. ادبي مئتود اوزره ايشله ­مه­ ييب­لرمي؟ پوئتيكايا دايانماييب­لارمي؟ گؤرونور كي ايشله­ مه­ ييبلر و دايانماييبلار. منيم آز ايشله­ ديييم يئرده، اوردا ادبييات گئري قاليب، تبليغ اولونماييب و يا تانينماييب دئديييم گولونج دوغورمازمي؟ البتته ادبييات تحرروك­لو بير دونيادير. ترپنمه­ يه ن گئريده قالاجاقدير و بو بيزيم مسئوليييتيميزي داها آغيرلاشديرير.

 ـ ايندي نئجه... يئني نثري او تايدا ايزله ­يه رک، اونلارين اينديکي دورومو نئجه­ دير؟ 

: يئني نثر، آذربايجان رئسپوبليكاسي­نين ايستيقلال ايل­لرينه قدَر داوام ائديب، گوجله ­نيب، تكامول پروسه ­سي كئچيرميشدير. بو نسلي، هله ­ده، آذربايجان ادبيياتي­ نين ان خللاق نسيل­لريندن بيليرم. اونلار موستقيلليك آتموسفئريله تطبيق اولونموش ده­ يه­ رلي اثرلر يارادا بيلميشلر؛ «اوتئل اوتاغي»، «آغ قوچ، قارا قوچ»، «ساري گلين» و...

«روستم ايبراهيم ­به‌ي­ اوو» 1994-جو ايلده «كان» موكافاتيني، 1995-جي ايلده ايسه «اوسكار» موكافتيني محض يازديغي سئناريويا ، («گونشدن اوسانميشلار» فيليمينه) گؤره آلميشدير. يعني بو موكافات يازيچيليق موكافاتي ايميش. «كان» و «اوسكار»ين آوروپا و آمريكانين سينمالارينا عاييد اولاراق، اونلارين موختليف و گاهدان ضيددييتلي ايستانداردلاريني بيليرسينيز. يئني تجروبه­ لر ده وار، «مقصد نور»، «رافيق تاغي» و آزجا كئچميش نسيله عاييد اولان «كامال عبدوللا». منجه «كامال عبدوللا» يئني بير حركتين تمليني قويا بيله ­جك گوجلو بير يوللا گئدير. بورادا آذربايجانين موترققي ايشراقي رومانيني گؤره بيليريك. «مقصد نور» و «رافيق تاغي» دا كئچميش نورمالاري پوزمايا جان آتيرلار. اونلار نثر، آتموسفئر و دونيا باخيش­لاريندا فرقلنديك­لريني گؤسترمه­ يه چاليشيرلار. مين پيس جاوابدان بير ياخشي  سوال ياخشي­دير. اونلار جاواب وئرمه­ دن، سورغونو سورغو اوسته قالاييب ان اساس دوشونجه ­لريميز؛ عاييله مسله­ سي، آتا بابالاريميزلا موناسيبتيميز، ميللتيميزه گؤستردييميز سايغي و اساسجا ميللييت مسله­ سي، مذهب و يالان-دوغرو، دوزلوك-اه‌ يري ليك كيمي توافوق اولونموش ايجتيماعي ده‌­ يرلر اؤنونده ائعتيناسيز قالماقلا (اؤرنك اوچون : «شاهزاده ديپئندئرانين محببتي» اثريني نظرده توتون)، يئني پوست­ مودئرن دونيالاردا ياشاما­لاريني عكس ائتديرمه­ يه چاليشيرلار. ان آزي، بيز اوخودوغوموز تئكنيكي ايجرالاردا قالان و حيكايه­ ني تئكنيك جعبه­ ابزاري كيمي گؤز اؤنونه گتيرن بوللو فارسجا حيكايه ­لردن داها درين و جيددي ايشلمه­ لريني ائعتيراف ائتمه­ لي­يم. بونلارين ايش­لري هله سونرالار قضاوت اولوناجاق...  

ـ گنج­لرينه گلديکده، يئنه بئله آلقيشلا ياناشيرسيز؟ بورادا گنج­لر دئديييمده، اؤرنه ­يين، «آزاد يازارلار بيرلييي» يازيچي­لاريندان دانيشيرام. ايلک باخيشدا، اونلارين يازي­لاريندا فورم و مؤحتوا يؤنوندن کلاسيک جيزيق­لاريندان چيخماق جهدلري گؤرونور...  چيخارديق­لاري «آلاتوران» آدلي درگيني گؤروب­سن کي؟   

: گؤرموشم... آمما نئچه آددان كئچندن سونرا، «يازيچي­لار بيرلييي» قارشيسيندا موقاويمت بايراغي قالديران گنج يازارلارين ال­لرينده، هله 60-90-جي ايل­لرين ادبيياتي اؤنونده بوشقابا قويمالي بير اثر يوخدور. رسمي ادبييات (و صنعت) اورقانلاري ­نين سيمووللاشمالاريندا سؤز يوخ. بؤيوك يازارلارين كؤلگه ­سينه گيرن ادبيياتدا، گنج يازارلارين اوزه چيخماسي داها چتين­دير. آمما جسارت گوجدن دوغماسا، نادانليقدان­دير. يعني بو نسيل هله اؤيره ­نمه ­لي­ دير. اونلارين نثرينده عصبي­ ليك وار. نثرين سورعتيني اله آلا بيلمه ­ييب­لر. و بيز، بورادا، اونلارين سولطه­ دن قورتولما ايستك­لريني بير حق دانيشيق كيمي دينله ­سك ده، اونلاردان ادبي اثر اوموروق. سؤز ايستيلاچي­لاري تأييد ائتمه­ ده دئييل، مسله حقدن كئچمه ­مكده ­دير. همين ايستيلاچي آدلانديرديق­لاريميزين ايستيلاسييلا موباريزه آپارساقدا، اونلارين آذربايجان ادبيياتينا گؤردوك­لري ايش­لري و ان موترققي سطيرلريني يازمالاريني اونوتمامالي­ ييق. دونيانين باشقا ادبييات­لاريندا دا بئله ­دير. ها بئله فارس ادبيياتيندا دا. 1340-1350 ايل­لرينده يارانان نسيل، ايللر بويو (هله رسمي اورقانلارا بئله آرخالانمادان) مطبوعات عالمينده حؤكمرانليق ائتمه ­ميشدي­ مي؟ هر نسيل اؤزونه گؤره چاليشمالي­ دير و ان سون قضاوت، اولاي­لار اوزره يوخ، اثرلر اوزره گئده ­جك­دير. 

ـ بورادا نئجه؟! ... بيزيم ادبي گئديشيميز بير نئچه عاميلدن تأثير آلاراق، باغا ساياغي ايره­ لي گئتمکده ­دير. بير آز گئندن باخاندا، ايرانين تورک ادبيياتي دانيشديغيميز مبحث­لرين هئچ بيري­ له اوست اوسته دوشمور.­  

  : ايراندا گئدن تورك ادبيياتي حاققيندا دئمه ­لي­يم كي؛ مسله­ يه نئچه يؤندن ياناشماق اولار. مدني-ايجتيماعي تضييق­لره باخماياراق، ان دانيلماز مسله، ادبي پروسه­ سي­ن ين دايانديريلماماسي­ دير. ادبي پروسه ايستر فارسجا، ايستر آنا ديليميزده داوام ائتميشدير. (فارسجا دئديييمده فارسجا يازان آذربايجانلي­لارين ادبيياتي­ني دئييرم.) سؤز يوخ كي، آنا ديلده يارانان ادبيياتين ديليميزين اينكيشافي مسئولييتيندن باش قاچيرماماغي، اونو بيزيم بحثيميزين و هر بير جيددي موباحيثه­ نين اساس داياناجاغينا چئويره ­جكدير. يعني ادبيياتين اساس ميقياسي ديل­ دير. آمما فارسجا يارانميش آذربايجان ادبيياتي، او دؤور ضيالي­ لاريميزين ياراديجيليغيندا، اساس فايز آلديغي ادبي-فلسفي پروسه­ ميزين اؤنملي بير پاييني اؤزونده ساخلاديغي اوچون آراشديريلمالي و موباحيثه­ يه قويولمالي­ دير. آنا ديليميزه گلديكده، چوخ­لاري­ نين سؤيله ­دييي کيمي، بو ديلده اولان ايكي ادبيياتين اولماسينا اينانميرام. ايكي ادبيياتين اولماسينا فيلولوژي و ديلين ستروكتورال نيظامي باخيميندان اساس فرقلنمه­ لر اولمالي ­دير. بير ديلين ايكي ادبيياتي اولا بيلمز. بير منطقه ­نين آيري منطقه­ لرله تاريخي، ايجتيماعي، سيياسي تجروبه­ لري ­نين فرقلنمه ­سيندن ادبييات آيريليغي يارانمير. ايل­لر اؤنجه، فارس تحكيه ­چيلييي­نين دؤرد اساس منطقه­ يه بؤلوندويو حاقدا بير مطلب اوخوموشدوم:[6]

1- آذربايجان و ايرانين شومال غربينده يارانان ادبييات

2- خوزيستان و ايرانين گونئيينده (جنوبوندا) يارانان ادبييات

3- ايرانين مركزي شهرلرينده (ايصفهان، شيراز و ...) يارانان ادبييات

4- ايرانين شومال شرقينده، اؤزلليک­له خوراساندا يارانان ادبييات.

يازي اوسلوبو باخيميندان اولان اوخشارليق­لار و ايچ قورولوش­لاريندا بعضي يئك­نسق­ليك­لره گؤره، بيرينجي­ له ايكينجي بؤلومو بير دسته­ ده، اوچونجويله دؤردونجو بؤلومو ايسه آيري بير دسته­ ده يئكونلاشديرماق اولوردو. يعني ايكي اساسي دسته ­ده يئرلَشه­ بيلن دؤرد ادبيياتدان صؤحبت گئديردي. بو بؤلمه­ لرين بؤلونمه­ فلسفه­ سي نه جينسدن­ دير؟ فارس ادبيياتيندا نئچه ادبييات ياشايير؟ منجه، بو بؤلمه­ لر تام عئلمي ­دير، آنجاق بونلارين هئچ بيري ادبييات آيريليغيني يارادا بيلمز. بس بو آدلانديرمالار يانليش­ديرمي؟ منجه يوخ. بونلارا ادبي تنقيدين ايشلك لوازيماتي كيمي باخمالي­ ييق. تبريز ادبيياتي، اورمو ادبيياتي، اردبيل ادبيياتي، زنجان ادبيياتي و باشقالاري. بونلارا آرتيرين گونئي ادبيياتي، قوزئي ادبيياتي، بورچالي ادبيياتي، دربند ادبيياتي، قازاقيستاندا يارانان آذربايجان ادبيياتي و باشقالاري. بو بؤلمه ­لر، هاميسي واحيد مخاطبين يارارلانا بيله­ جك ديل، آتالار سؤزلري، تاريخي ذئهنييت­لر و اورتاق فونكسييونال قيرامئرين اورتاقليغي ­نين گوجلولويو اوزره آذربايجان توركجه­ سي­ نين ادبيياتي سيرالارينداديرلار. سؤزو اوزالتماغيمدان بونو دئمك ايسته­ ييرم كي، آذربايجان جمهوريتينده گئدن ادبيياتين بيزله اولان موناسيبتي مثلن آنادولودا گئدن ادبيياتين بيزله اولان موناسيبتي­ له عئيني دئييل. تورك ادبيياتي بحثينه گيرديكده، اونلارلا (و ها بئله بوتون باشقا تورك ميللت­لرله) بيرگه تورك ادبيياتي سيراسيندا اولساق دا، آذربايجان جمهوريتي ادبيياتي ايله بير ادبييات ايچينده ياشاييريق. بيزيم شئعرلريميز اونلارين درس كيتاب­لاريندادير و اونلارين متن­لري بيزيم ادبيياتچي­لاريميزين ايل­لرله دايانديق­لاري ادبي نمونه ­لر ساييلير. كيپ بير ادبي علاقه واردير و بو ادبي علاقه تاريخي اينكيشافيميزين جانينا ساريليبدير. هئچ حيصصه­ نين ادبيياتي، او بيري تايين ادبيياتيندان موستقيل و تك­جانينا كاميل دئييل. بوتون تضييق ائديجي سيياسي-ايجتيماعي عاميل­لر، ايل­لر بويو بو آيريليغي ديكته ائده ­بيلمه­ ييب، بو علاقه­ لري آرادان قالديرا بيلمه­ ميشلر. آذربايجان رئسپوبليكاسي ياراناندان بري، بو ادبي آل­-وئرلر داها دا آرتميشدير. «قوزئي ادبيياتي» و «گونئي ادبيياتي» تئرمين­لري، سيياسي تاريخي ايجتيماعي فاكت­لارا اساسلاناراق، دوغرو بير عئلمي آراشديرما آپارماق اوچون تئرمين حددينده­ ديرلر. بس قوزئي ادبيياتي­ني توركييه توركجه ­سي ­له توتوشدوروب، بير شراييطده ترجيح و يا سئچمه مرحله­ سينه گتيرمك بوتونلوك­له يانليش­دير. توركييه­ نين چوخ ياخين اولان اؤنجول ادبيياتيندان اولدوقجا فايدالانمالي­ ييق. دؤوره ­سينه دووار چكن اؤزو حبسده قالاجاق، آمما متن­لريميزين آذربايجان متني اولماسيني اونوتمامالي ­ييق. بعضن گنج­لريميزين اثرلرينده يارانان بو ناقيص توركييه­ لشمه­ ني ادبيياتيميزين اينحيرافي مسيرلريندن بيليرم و اونون ادبييات تاريخيميزين آرخالانا بيله­ جه­ يي بير حركت ياراتما قابيلييتينه اينانميرام. قويون «آنار»ين «اوتئل اوتاغي» اثريندن نئچه سطير اوخويوم:  

«... آمما کريمي ان چوخ تعجوبلنديرن، حتتا بير آز پريشان ائدن او ايدي کي، بوردا، آنکارادا دا، معروضه ­سي بؤيوک رئاکسييا دوغورمادي. چيخيشيندان سونرا، يالنيز چوخ قوجا بير کيشي - بو مشهور قورقودشوناس فخرالددين به‌ي ايدي – چَلييينه داياقلاناراق، کريم­ـه ياناشدي، تبريک ائتدي

- بئن عؤمروم بويو ائثئرلئريمدئ تورک­لرين بو توپراک­لاردا ميلاددان چوخ اؤنجه يئرلئشديک­لئريني کانيتلاميشيم - دئدي. صديارين معروضه­سي قات-قات داها بؤيوک اوغور قازاندي. اليفبا مسله­ سيندن دانيشيردي، «خ»، «اَ» حرف­لري­ نين آذربايجان ديلينده هئچ بير اهمييته ماليک اولماديغيني ايثبات ائديردي. «بو حرف­لر عايني ديل اولان آذري لهجه­ سيني تورکييه تورکجه­ سيندن آييرير، بو حرف­لر بيزه گرک دئييل» - دئييردي. بو سؤزلردن سونرا، سالوندا گورولتولو آلقيش­لار قوپدو. آنکارادا «ستاد» اوتئلينده صديارلا بير نؤمره ده قاليرديلار. کريم صدياري اوغورويلا تبريک ائله ­يندن سونرا، سوروشدو:

- دئييرسن ديل­لريميز آراسيندا هئچ بير فرق يوخدور؟ 

صديار: - البتته، - دئدي. - نه فرقي وار کي، سن­جه؟ 

کريم:

  - ايندي آشاغي­دايديم، - دئدي. - وئستيبولده[7]. باکيدان توريست­لر گليب. بيزيم بو اوتئلده يئرلَشيرلر. بئله بير ديالوق ائشيتديم. اينضيباطچي بيزيم توريست قادين­لاريميزين بيرينه:

- سيزه ايکي کيشي­ليک اودا وئرييوروم، - دئييردي.

قادين حيددتله: - منه اؤزگه کيشي­لرله نؤش اوتاق وئريرسن، - دئييردي، - اؤز اريمه نه گليب به­ يَم.

 اينضيباطچي:  -ائر نه، کوجامي؟ - دئييردي.

قادين داها آرتيق غئيضله:  - قوجا نؤش اولور، - دئييردي، - لاپ جاوان، بيغي بورما جئييلدو. 

صديار شاققاناق چکيب گولدو.

- بوشلا، سن آللاه،- دئدي. - بوردا بئله چيخيش ائله­ مک لازيمدي، برات. گؤردون نئجه قارشيلاديلار؟ آيري جور دانيشارسان بير ده چاغيرمازلار. آمما اؤز آراميزدي، او بارداکي قيزي گؤردون. عنتيقه شئي­دي هه... حؤکمن تانيش اولاجام اونونلا. ياخشي سنين ايش­لرين نئجه اولدو؟...» (آنار اثرلري 4- جو جيلد، سون اون ايلين يازي­لاري (1903-2003)، شئعرلر، نورلان نشرياتي، باكي 2004) 

اثري بوتونلوك­له اوخوماق لازيمدي. بورادا عوام آراسيندا گئدن بيزيم ضيالي­لاريميزدا گئدير. گاهدان گؤرورسن بيري «كيشي­سل» دئيير، آنلامي دا «فردييت»دير. هله «سل»و «سال» سونك­لري­ نين آذربايجانجانين قرامماتيكاسيندا يئرلي اولوب اولماماسي بحثينه وارميرام. اونونلا دا، بئله منجه بو سؤزجويون آنلامي آذربايجان توركجه­ سينده فارسجا «مردانه» سؤزجويونون قارشيليغي اولا بيلر. بئله سؤزجوك­لر و بئله داورانيش­لار چوخدور. بو سؤزجويو ده سؤز چكيب تأكيد دورومونا گتيردي. بير ادبييات، بلکه ده بير  منطقه ­ده داها چوخ اينكيشاف ائتدي. قوزئي ادبيياتي ­نين اينكيشافي بو جينسدن­ دير. آيري ادبييات­لاردا دا، بئله حاديثه­ لر آز اولماميشدير. اؤرنك اوچون فارس ادبيياتي اورتا آسيادا اينكيشاف ائتدييندن نئچه  عصير سونرا، ايرانين مركزي شهرلرينه يول آچماميشديرمي؟ سيز دئميشکن قاييداق ايرانين آذربايجان ادبيياتينا. دئديييم كيمي اساس بحثيميز توركجه يازيلان ادبيياتدا اولمالي­ دير، لاكين اينديكي ميللي پوئتيك تفككوروموزون اساس بير پايي فارسجا يارانان ادبيياتدا كئچميشدير. بو ادبيياتين آراشديرماسييلا، چوخلو جيددي پروبلئم­لريميزي آراشديرميش اولوروق. ادبيياتيميزين قوزئي و گونئي بؤلوم­لرينده گئدن اينكيشافيني، فرق­لريني و اوخشارليق­لاريني دوشونمك اوچون، «ريضا براهني»­نين فارسجا يازيلميش «رازهاي سرزمين من» آدلي روماني­ نين «ائلچين افندي­يئو»ين «اؤلوم حؤكمو» روماني ايله توتوشدورماغي فايدالي گؤرورم. منجه بونلار ياخشي نمونه ­لردير. هر ايكي اثرده آذربايجان پروبلئمي واردير. هر ايكي اثرده موسللط سيياسي سيستئم ايفشا اولونور. هر ايكي اثر موختليف يوللارلا اولسادا فورمادا يئني ده ‌ييشيك­ليك­لره ال آلتما دغدغه­ لري واردير. هر ايكي اثرده آذربايجان طالئعينه حاكيم اولان تانينميش شخص­لرين عئيني حضورلاري واردير. بو اثرلرين يازيلما تاريخ­لري ده ياخين­دير. هر ايكي اثرده باخيش بوجاغي ايله معلومات دايره ­سي­ نين آراسيندا اولان ستروكتورال رابيطه­ يه ووقوف واردير. پوئتيكا باخيمدان نئچه­ سسلي­ ليك حدودونو و نائلييت­لريني، اوبرازلارين معلومات داييره ­سييله اوخوجونون معلومات داييره ­سي آراسيندا اولان موناسيبت تعيين ائدير. دئديييم كيمي، سون ايل­لرده، ايراندا فارس ادبيياتي، تاريخي ايجتيماعي سيياسي ضرورتلره گؤره نئچه ­سسلي ­لييه دوغرو آدديم آتمايا جهد گؤسترميشدير. بونون، دونيا ادبيياتي كيمي، خاريجي عاميل­لري اولسا دا، گوجلو داخيلي موحرريك­لري واردير. «رازهاي سرزمين من»ـي، بو جهدين ايلك نمونه ­لريندن سانماق اولار. آمما بو حركت هله اؤز اينكيشاف ائتميش نمونه­ لريني اوزه چيخارماميشدير. «رازهاي سرزمين من» راوي­لرين موختليف­لييينه اساسلانسا دا، نئچه­ سسلي­ لييي اوبرازلارين ايچ دونيالارينا چكه بيلمه­ ميشدير. يعني اينسان پسيخولوگيياسينا ضعيف ياناشاراق، بؤحراني اؤز زامان و مكانيندان آيري زامان و مكان­لارا ضعيف توللاماقلا، بؤحراني اينسانين ابدي-ازلي بؤحران­لارينا قووشدورا بيلمه­ ميشدير. عئيني فاكت­لارين آلت­ قات­لاريندا گئدن دونيانين سسي يوخدور. اثرده «پهلوي» رژيمي ايفشا اولونور. بو ايفشا، درين­لره دالمير يعني رژيمين آرخاسيندا دايانان فلسفي-تاريخي تفككورون قورولوشونا و بو قورولوشون دئوريلمه ضرورتينه ياناشمير. اثر بو سيستئمي ياراديب، اونو قبول ائدن اينسان ذئهنييتينه توخونمور. بو ايش، اينسان آنلاميندا اساس باخيشين جينسي­ نين دئوريلمه ­سيني طلب ائديردي و منجه روماندا و رومان ائتکي­ لنن عئيني زامان و مكاندا، بو ضرورته ووقوف يوخ ايميش. بو، «ريضا براهني»­نين يوخ، بوتون ايراندا گئدن تفككورون اؤزللييي كيمي ده قلمه آلينا بيلر. آنجاق بيز تحكييه حددينده دانيشيريق. اثرين بعضي سطيرلري ژورناليستيك معروضه­ لره اوخشايير. ايجتيماعي سيخينتي ­نين و اينسان روحونون ابدي ازلي ووجودو روماندا غاييب­دير. «اؤلوم حؤكمو» ايسه عومومن ايلاهي باخيش بوجاغييلا يازيلسا دا، بو ايلاهي­ ليك اوبرازلارلا محدودلاشان بير ايلاهي ­ليك­ دير. تكجه اون آلتينجي فصلي، «مورشود گولجهاني» آدلي فرعي بير اوبراز ريوايت ائدير. بيلدييينيز كيمي، آيري آيري راوي­لرين مونولوق كيمي ايفا ائتديك­لري ريوايت، تك­­ اوبراز سيستئمي­ نين علئيهينه­ دير و عومومن موختليف راوي­لرين ريوايت­لري­ نين يئكونلاشماسيندان، اوخوجو بير جوره ايلاهي باخيشا ياخينلاشا بيلير. «اؤلوم حؤكمو»نون محدود ايلاهي باخيش بوجاق­لاري، اوبرازلارين بير بيريندن نئجه خبرسيز اولدوق­لاري بير آتموسفئري، چوخ عئيني بير شكيلده گؤستره­ بيلير. واختييله «عبدول غاففارزاده»­نين قارداشي «خيدير موعلليم»، «خسرو موعلليم»له بير مكتبده درس دئميش، اورتاق بير مسله اوزره «خيدير موعلليم» گولل‍ه ­له­ نيب،  «خسرو موعلليم» ايسه سورگونه گئتميشدير. بونو، «عبدول غففارزاده»، «خسرو موعلليم»له اوزلَشنده بيلمير. «خسرو موعلليم» ده بيلمير. اونلارين موستقيل موناسيبت­لري اولور. طلبه «موراد ايلديريملي»نين دايي­سي «موراد ايلديريملي»، واختييله «هاردروت» طاعونوندا «خسرو موعلليم»له بير حاديثه­ ده اولموشلار. («خسرو موعلليم»ـين بوتون عاييله ­سييله «موراد ايلدريملي» همين حاديثه ­ده اؤلورلر.) طلبه «موراد ايلديريملي» ايله «خسرو موعلليم» ده بو كئچميشدن موستقيل موناسيبت­لر قورموشلار. رومان بئله­ سي حاديثه ­لرله دولودور. اوبرازلار آچيقجا بير بيرلرينه و حتتا اؤزلرينه بلد دئييل­لر. «ائلچين افندي­يئو» سانکي بير علاقه­ لر شبكه ­سي يارادا بيلميشدير. اثر دونيانين نئچه­ سسلي و مورككب ووجودونا ياخينلاشا بيلميشدير. دوغروسو، نئچه ­سسلي­لييي مورككب­ليكده تاپا بيلميشدير. «ائلچين افندي­يئو» اينسان­لارين نئجه اؤزلري ده خبرلري اولمايان اولاي­لاردان ائتکي­ لنمه­ لريني اوغورلا اوزه چكيب، اينسان­لارين حتتا اؤزلرينه گيزلي اولان بعضي حيصصه ­لريني اوخوجونون گؤزو اؤنونه گتيرير. مورككب اينسان ياراتماق اوچون مورككب اينسانا اينانماق لازيم­دير. بو ايكي اثر، گونئي و قوزئي اينسان­لاري­ نين ايجتيماعي سيياسي فلسفي دوروم­لاريني ايضاح ائده بيله ­جك قابيلييت­لره ماليك ديرلر و اونلار حاقدا اطرافلي بحث لازيمدير. «رازهاي سرزمين من» آنا ديليميزده يازيلماسا دا ان آزي پوئتيك پروبلئملريميزي آناليز ائتمه­ ده ان ايشه گلن متن­لردن دير.  

ـ آذربايجان ادبيياتيندان دانيشديقدا، يالنيز و يالنيز آذربايجان ديلينده يازيلميش ادبيياتدان دانيشيريق. آنا ديللي تحکييه ادبيياتيميزي اساس توتوب اونا گؤره دانيشيغينيزي ايسترديم. 

  : باخين باياقدان دئديكلريمي تيكرارلاييرام؛ ادبيياتين اساس ميقياسي ديل­ دير. يعني اثر نه ديلده يازيلارسا او ديلين ادبيياتي حئسابلانير. آمما بيز بوتون دونيادا اولدوغو كيمي پوئتيكاميزي و ادبي پروسه ­ميزي بيزيم دغدغه ­لر و شراييطيميزده يارانان فارس ديللي ادبيياتا ائعتيناسيز آپارا بيلمه­ ريك. «نيظامي» سيز و «رومي»سيز اورتا شرق ادبيياتيندان دانيشماق اولماز. آوروپادا دا بئله­ دير چوخلو اؤلكه ­لر ميللي ادبيياتلاريني قوراندان سونرا دا پوئتيكالاريني اؤنجه ­لر ياراتديقلاري لاتين ادبيياتيندان محروم ائتمه ­ميشلر. بونو نظري بحثلريميزين ايمكانلاريندان حئسابلامالي­ييق. يوخسا اساس ادبيياتيميز اولان آنا ديللي تحكييه ­ميزدير. اساس آنا ديل­ دير.  آذربايجان ادبيياتيندا گونئي مسله­ سينه گلديكده، نئچه يؤندن ياناشماق اولار. بيريسي يازارين هارالي اولماغيندان آسيلي اولماياراق گونئي دغدغه ­سي و اونون پروبلئملريني اؤزويله ياشادان ادبييات. بو اثرلري «جليل ممدقولوزاده»ـ­دن باشلاماق اولار. بئله­ ليک­له، «محمد سعيد اوردوبادي»­نين «دومانلي تبريز» آدلي روماني باشدا دورور. «ميرزه ايبراهيم ­اوو»ـون «گله ­جك گون» روماني و «جنوب حيكايه­ لري» ده بو سيرادان­ دير. زنجير هله ده داوام ائدير، «آنار»ين «آغ قوچ، قارا قوچ» باشليقلي اثريني ده بو جينسدن بيلمك اولور. ايكينجيسي، ايراندا دوغولوب بو فضادا بويا باشا چاتان ناثيرلرين يازديقلاري ادبييات. گونئيلي دئمكدن هدف گونئيده دوغولماق اولسا، بونلارين سيراسيندا گونئي دوغوملو «مير جلال پاشايئو» و «ميرزه ايبراهيم اوو» كيمي­لريني ده آد آپارماق اولار. آنجاق بيز، گونئيده دوغولماق و گونئي دغدغه ­لي اولماقدان باشقا، بو فضانين ادبي تضييق­لري آلتيندا ياشاييب بورادا اولان ادبييات شراييطينده يارادان­لاري نظرده توتوروق. ان آزي عؤمورلري­ نين اساس بير حيصصه ­لريني بو ادبييات شراييطي­له ياشامالاريني اساس توتمالي ­ييق. مسله ­نين كؤكونو 20-جي عصرين اوول­لريندن باشلانان تجددود و يئني­لنمه آدلانان تحرروكاتدان باشلاماق اولار. بونو، بو دانيشيقدا گئدن مقصديميزه اويغون گؤرمورم. منجه جيددي تحكييه ­چي­ليك ايكينجي دونيا موحاريبه­ سيندن سونراكي نيسبي آزادليق فضاسيندا و يئني­جه آياق توتموش آنا ديللي مطبوعاتين حيمايه­ سينده يارانان اثرلرده اؤزونو گؤسترير. «ميللي حؤكومت» بو ادبي-ايجتيماعي اينكيشافدا اساس رول اويناميشدير. مسله­ ني جنجالا چكمك لازيم دئييل. هئچ بير سيياسي جريان، بو قدَر بيزيم ديلدن حيمايت ائتمه­ ميشدير. سيياست بحث­لريني سيياست آدام­لارينا بوراخيرام، آمما بو اولايين ادبييات عالمينده اولان عئيني نتيجه ­لريني دانيلماز بيليرم. او دؤورون دؤوري مطبوعاتيني واراقلاديقدا، چوخلو آدلاري گؤرمك اولور. بو نسلين ضيالي­ لاري كؤز آلتيندا قالان اود كيمي، يئرلي ادبيياتيميزي و وارليغيميزي، «پهلوي» دؤورونون مدني سيخينتيلي ايل­لريندن كئچيريب اينقيلابدان سونراكي نسيله يئتيره­ جك­لر. بونلارلا اينقيلاب نسلي­ نين آراسيندا دؤرد يا بئش نسل ضيالي دايانير. اونلار بو وارليغي صاحاب چيخا بيله­ جك بير نسيله يئتيرينجه قوجالاجاقلار. 

ـ قاييداق تحكيه بحثينه! ايران آذربايجانينين تحكييه ­سي نه اولاي­لاري باشدان كئچيرميشدير؟  

: دوغرودور. آذربايجان ضيالي­ليغي موستقيل بير بحثدير. البتته من تحكييه­ ميزي ائتكي­ لنديرن عاميللردن دانيشيرام. سيز دئيه­ ن كيمي كئچك اؤز يئرلي تحكييه­ ميزه. ايلك تحكييه­ چي­لريميزده سولچولوق گوجلودور. بونو فيرقه ­چي و يا توده ­چي يازيچي­لارين نه سوييه ­ده حيزبي ايدئال­لارا ياناشماق­لاريندا آيدينجا گؤرمك اولور. آمما فيرقه­ چي­لره گلديكده، سوسياليزمله ياناشي و گاهدان حتتا اونو كؤلگه ­يه سالاراق، ميللييتچي­ليك و يئرلي شاخيصه­ لري ده‌­ يه رلنديرمک گوجلودور. بو فاكتور تاريخي مؤوضوعلاردا يازان يازارلاريميزدا داها بللي­ دير. منجه آذربايجان ضيالي سي­نين تاريخ دغدغه ­سي اولماسي و بو دغدغه­ نين روماندا و تحكييه ­ده نئجه عكس اولونماسي، آراشديرما مركزي اولا بيله ­جك بير مسله­ دير. تاريخيميز باجاسيندان تحقير اولماميشيق به ­يَم؟ پروفسور «محمدتقي زهتابي»نين اينقيلابدان سونرا ياييملانان تاريخ كيتاب­لاري، ـ اونلارين باها قييمتينه باخماياراق، ـ گرَك ده ان چوخ ساتيلان كيتاب­لاريميزدان اولسونلار. تاريخ مسله­ سي بيزيم نئجه اوبراز ياراتماغيميزي دا ائتکي­لنديريب­دير. «ميللي حؤكومت»ـدن سونرا ياساقلانميش ادبيياتين (جان قورتاريب قالان) يازارلاري كؤچموش اولورلار. گونئي ادبيياتي­ نين اساس پايي موهاجيرت ادبيياتي اولور. يئرلي اوخوجونو الدن وئرميش يازارلار، قوزئي­لييه و يا گله­ جك­ده اينساني حوقوقونا ماليك اولموش نسيل­لره گؤنئيدن يازماغي اساس توتورلار. بورادا ايسه گيزليجه تحكييه­ ني خوصوصي بير پروسه كيمي داوام ائتديرن­لر ده واردير. باياق دئديييم كيمي، «گنجعلي صباحي» بونلاردان­دير. «قهرمان قهرمان­زاده»ـ­ني ده، 1958-جي ايلده سووئت­لر اؤلكه ­سينه پناه آپارينجا بو جينسدن سايماق اولار. «حبيب ساهير» و «محمدتقي زهتابي»­نين ده اساس دغدغه ­لري تحكييه ­چي­ليك اولماسا دا، بو ژانردا ائله­ ديك­لرينه گؤره بورادا يئر وئرمك اولار. سيخينتي، موهاجيرت و مدني چاتيشمامازليق­لار، بورادا گئدن ادبيياتي من «ضرورت فضاسي» آدلانديرديغيم بير شراييطه گتيريب چيخارميشدير. منجه، بو شراييطده گئدن ادبيياتين پوئتيكاسينا و نئجه ­لييينه (هئچ ده موجه اولمايان) ائهمال­كارليقلا ياناشماق، اؤزو آراشديرمالي بير مبحث­دير. بو ائهمال­كارليغين بير وارثي ائله بيزيم اينديكي نسليميزدير.  آمما كئييفيت باخيميندان، «عابباس پناهي ماكويي»ـني ايران آذربايجان تحكييه ­چيلييي­ نين اؤنملي يازارلاريندان بيليرم. «عابباس پناهي» هر نه­ دن اؤنجه، رومان يازاري ­دير و رومانچيليقدا دا، تاريخي رومانيميزين اينكيشافيندا اساس رولو واردير. «پناهي»­نين دوغوم ايلي 1281دير و ياش باخيميندان ايرانين بيرينجي نسل تحكييه ­چي لري له ياشيد حئسابلانير. پناهي اؤزو، اؤز اؤزلويونده قطعييتله گونئي ادبيياتي آدلانديرا بيله­ جه­ ييميز بير ادبيياتدا سيغاراق گوجلو بير ادبي پروسه ­­دير. تأسسوفله اونون آنا ديليميزده يازديغي اثرلر، عومومي اولاراق، عرب كؤكلو اليفباميزدا چاپ اولماميشدير. بو اساسي بير بوشلوقدور و بونون آرادان قالديريلماسيني آرزولاييرام. «فتحي خوشگنابي»، «حميد محمدزاده»، «فيروز صادق­زاده»، «محمد داداش­زاده»، «الف. نورانلي»، «م. ارمغان»، «صمد محمودزاده»، «قاسم فيروزان»، «ع. كاتبي»، «صمد صباحي»، «به‌ي­لر حائلي»، «باقر افتخاري»، «سؤهراب طاهير»، «رحيم دقيق (جادنيكو)» و باشقالاري. قلمدن سالديق­لاريم دا واردير. بو نسلين يازي­لاريني سهمانلاييب، چاپا و تحليل اؤنونه چيخارمالي­ ييق. صيرف «سؤهراب طاهير»ين آلتي رومانيندان خبريم وار، آمما هله ماتئريال­لار اولدوغو كيمي الده دئييل. بو بير عومومي و گئنيش هيممت طلب ائدن آراشديرما ماتئريالي­ دير.   «اينقيلاب»ـدان سونرا، مطبوعات فعاللاشير. سايديغيم آدلارين نئچه­ سي، ايل­لرله گيزلي­جه الده ائتديك­لريني گنج­لرله بؤلوشمه­ یه باشلاييرلار. ايلك اؤنجه، ديل مسله ­لري حلل اولونمالي­ دير. ياشلي­لاردان كئچرسك، حؤرمتلي «ناصير منظوري»­نين ياراديجيليغيني اساس بير كؤرپو كيمي بيليرم. 1380-جي ايلدن بري، يئني بير نسل گليشمکده ­دير. «ناصير منظوري» بو نسل­ ايله «اينقيلاب» چاغي­ نين يازارلاري آراسيندا بير كؤرپودور. مسله ­نين اهمييتينه گؤره، آدلاري سادالاميرام. بو بير موستقيل دانيشيق و عئلمي بير آراشديرما ماتئريالي­ دير.  ادبي چاليشمالاريمدا و يازديغيم تحليل­ لرده بو ايشي باجارديغيم قد‌ر يئرينه يئتيرمه­ يي مقصد گؤتوروب، حاضيرلاديق­لاريمي ياخين گله­ جكده اوخوجو الينه يئتيرمك آرزوسوندايام.  

-------------------

دانيشيقدان سونرا:

  ـ بوردا، دانيشيغيميزين آخاريندان بير آز آيري دوشسه ده، ائله حيکايه ادبيياتيميزين چرچيوه ­سينده اوچ باشقا قونويا دا توخونماق ايسترديم: 

1.  ادبي موباحيثه­ لرده، هردن شاعيرانه نثردن ده سؤز گئدير. سيز نئجه دوشونورسوز؛ شاعيرانه نثرين يئري تحكييه ادبيياتيندا نئجه­ دير؟

  هرنه­ دن اؤنجه نئچه مسله ­ني آيدينلاتمالي ­ييق؛ شاعيرانه ­لييي، شئعري و ژانرلارين ان كيچيك اجزالاري­ نين نه اولدوقلاريني. سورغو موضئعيندن باشلاييرام. بو نئچه جومله ­ني نظرده توتون. «بو فيلم شاعيرانه­ دير.»، «بو تابلو شاعيرانه ­دير.»، «بو ناغيل شاعيرانه­ دير.» و... بونلاري دئيه­ نده نه­ يي دئمك ايسته ­ييريك؟ اثرين متنينده اونو شاعيرانه يا غئيري-شاعيرانه ائدن نه واردير كي؟ بونون صنعت­ده نه شأني واردير؟ شئعر ايله اؤزل موناسيبتي وارديرمي؟ باشقا صنعتلرله نئجه؟ اصلن صيرف صنعته عاييدديرمي؟ مثلن «نه شاعيرانه منظره ­دير.» دئيه­ نده نه دئمك ايسته­ ييريك؟ سوسور دان سونرا داها سيموول، شئي ايله برابر دئييل بلكه دالل­ين مدلول ايله ايشاره ائديجي موناسيبتي واردير. يعني ديل عونصورلري، يالنيز موناسيبتلر سيستئمي­نين اجزاسي كيمي معنالانديريليرلار. بو سؤز؛ دالل­ين چوخ دا مدلول­دان آسيلي اولمايان وارليغيني اوزه چيخارا بيلن موضئعين باشلانيش نؤقطه­ سي­ دير. شئعر سؤزجك­دن يارانير يوخسا جومله­ دن؟ سورغو تزه دئييل. منجه بو سورغو اونون كؤكو يعني سوسورون آرايا چكدييي موضئعين اهمييتيني گؤسترمه­ ده داها اؤنم داشييير. قاييداق شاعيرانه­ لييه. اورتاق «شاعيرانه» لفظيني ايشله ­ده بيلديييميز قابيلييت، موختليف ژانرلارين هانسي اورتاق ووجودلارينا دايانير. يعني بير ناغيلي، بير حيكايه ­ني، بير شئعري ، بير رسيمي و بير فيلمي شاعيرانه ائدن نه­ دير؟ آزجا ديققت­له بو اورتاق عونصورو اشيا آراسيندا گئدن داخيلي موناسيبت­لرده ايزله­ مك اولار. من­جه شاعيرانه ­ليك اشيا آراسي ائستئتيك موناسيبت­لردير. شئعرين ده باشقا ژانرلار كيمي شاعيرانه­ ليكدن پايي واردير. شئعر صيرف شاعيرانه ­ليك ­له شئعر اولا بيلمز. باشقا ژانرلاردا بئله، شاعيرانه­ ليك­ له كيفايت­لنه بيلمزلر. بحثين بير اوجو شئعر تعريفي حاقدا گئدن بحث­لره يول آچير و بو دانيشيغيميزين هدفي دئييل. آمما شئعرين دالل­لار(/سؤزجوك­لر) آراسيندا گئدن ائستئتيك رابيطه­ لردن يارانماسيني قبول ائدرسك، سورغوموزون جاوابينا داها ياخينلاشا بيله ­جه ­ييك. تحكييه­ نين اساس عونصورو جومله ­دير. يعني ان كلاسيك تعريفله دئسك، ريوايتين اوچ اساس حيصصه ­سي يعني باشلانيشي(/موقددمه ­سي)، جاني و قورتولوشو اولمالي ­دير. بونلاري ان آزي بير جومله­ ده يئرلشديرمك اولار. سؤزجك­دن فايدالانماق ايسته ­ييريك ­سه زمينه ياراتمالي­ ييق. نثر، شاعيرانه ­لييه دوغرو گئده بيلر. بوتون صنعت ژانرلاري شاعيرانه ­ليكدن فايدالانان يئرده نثر نييه فايدالانماسين. بو بير ايمكان­دير و ايمكان­لارا گؤز اؤرتمك عقله اويغون دئييل. تحكييه، اشيا آراسيندا گئدن ائستئتيك رابيطه ­يه گيريشه بيلر آمما بو رابيطه پوئتيكا طلباتي اساسيندا اولمالي­دير. ائله همان «اؤلوم حؤكمو»ندن نئچه سطير اوخويورام:   «... اودونلارين اوستونه قالانميش مئييتلرين ان يوخاريسينداكي حكيم خودياكووون جسدي ايدي و تونقالين آلووو شؤعله ­لنديكجه بير كناردا دايانيب هيجاندان ديزلري اسه- اسه، اوركلري دؤيونه- دؤيونه او دهشتلي تونقالا تاماشا ائله­ يه ن يئرلي پارتييا و كومسومول فعاللاري، حكيم خودياكووو او ساعات تانيدي. فايتونچو اووانئسين قاپي­ بير قونشوسو اولان بو خئييرخاه، خوش­ صيفت، گؤزو توخ، ضيالي آدام پارتييا ايشچي­لريني، كومسومولچولاري دا آز موعاليجه ائتمه ­ميشدي و ايندي بو آدامين اؤزونون تونقالدا بئله ­جه يانماسي، او بير قالاق مئيييتين اوستونده بيرينجي اولماسي، ائله بيل كي، او گئجه او تونقالين قورخوسونو، واهيمه ­سيني داها دا آرتيريردي.  آلوو گئت- گئده قيزيشديقجا بيردن حكيم خودياكووون الي ياواش- ياواش قالخماغا باشلادي؛ البتته، تونقالا باخان او آداملار باشا دوشوردولر كي، ايستي شيددتلنديكجه عضله­ لر ييغيشير و حكيم خودياكووون قولو دا بونا گؤره ياواش- ياواش قالخير، آمما او دم او الين ائله­ جه ياواش- ياواش قالخماسيندا، ائله بيل كي، بير هده وار ايدي، ائله بيل كي، طاعون بوتون دونياني هده ­له ­ييردي. عئيني زاماندا، او الين او جوره قالخماسيندا، عومومييتله، دونيانين گوناه ايشلرينه بير خبردارليق دا وار ايدي و اوزاقدان او تونقالا باخان يئرلي پارتييا و كومسومول فعاللاري آراسيندا بير سيرا وظيفه­ لي آداملارين (بير-بيرلريندن خبرسيز!) بوتون ايچيني غريبه بير حيسس بوروموشدو؛ قورخو ايله موتأثثيرلييين، پئشمانچيليغين قاريشيغي. ...» بو مثالي گتيرمه ­ييمدن اشييا آراسي ائستئتيكانين، گؤزل فضالاردان يازماقلا فرقيني آيدينلاشديرماق ايسته­ ديم. سئنتيمئنتال و اوره ­يي نازيك آداملار اوچون چوخ دا گؤزل دئييل آمما اوندا داخيلي بير شاعيرانه­ ليك واردير. « آلوو گئت- گئده قيزيشديقجا بيردن حكيم خودياكووون الي ياواش- ياواش قالخماغا باشلادي.» بو شاعيرانه ­لييي تداعي ­لر داييره ­سينده ده بحثه چكمك اولار. باشقا بير ميثال؛ ايسماييل شيخلي­ نين «اؤلن دونيام» اثريندن اوخويورام:   «... چاپيق امراح بوتون بونلاري يادينا سالديقدا اوشورگه­ لندي. بوزوشه ­رک بوخاري­يا ياخينلاشدي و الينده کي اودونلاري اوجاغا آتدي. بوخاري قورلانيب آلوولاندي. شهر آلينديقدان سونرا اوچ گون آپاريلان تالاني، قوشقار چاييني کئچمک ايسترکن سويا غرق اولانلاري گؤزونون قاباغينا گتيردي. سئلله­ مه ياغيش آلتيندا آشيب-داشان گنجه چاييندا گؤردويو بير منظره ايندي ده اونو دهشته گتيردي. چاي ساحيلده ­کي آغاجلاردان بيريني کؤکوندن قوپاريب سويا سالميشدي. آغاجين دوشدويو يئرده سو ليلله ­نيب بورولغانا چئوريلميشدي. بو بورولغاندا ايکي مئييت فيرلانيردي. بيري قارايانيز، بيري ساري­شين. اونلار بير-بيري­ نين چيينيندن مؤحکم ياپيشميشديلار. امراح خئيلي اونلارا باخدي و آييرد ائده بيلمه­ دي کي، بونلار سون آندا بير-بيرلريني بوغوب سويا باتيرماق ايسته ­ميشلر، يوخسا بير-بيرلرينه کؤمه­ يه چاليشميشلار. ايندي ده بير-بيرلريني بوراخميرديلار. بورولغان ايسه اونلاري گاه سويون ديبينه چکير، گاه دا اوزه چيخارديب فيرلاديردي. ...» بورادا دا شاعيرانه بير جومله ­ني دئمه­يه نه ساياق زمينه ­نين يارانماسينا و اوندان نئجه يارارلانمادا پوئتيك و تئكنيكي عاميللري ايزله ­مك اولار. (... بورولغاندا ايکي مئييت فيرلانيردي). پس شاعيرانه­ ليك مسله ­سين حلل اولونموش سانيرام. آمما تحكييه ­چي آيري بير ژانر يعني شئعرين اؤزل ايمكانلاريندان دا فايدالانا بيلرمي؟ يعني نثر ده شئعرييته ياخينلاشا بيلرمي؟ نثرده سؤزجوكلر آراسي ائستئتيك رابيطه ­يه نئجه توخونماق اولار؟ كوللي بير باخيمدا تحكييه ­نين ان كيچيك حيصصه ­سي يعني جومله­ نين اجزاسي سؤزجك­دور. آمما او دا اؤزونو جومله كاناليندان گؤستره بيلير. يعني بو رابيطه­ ده اساس جومله­ دير. محمدريضا صفدري­ نين سون ايللرده فارسجادا «تيله ­ي آبي» آدلي كيتابي ياييلميشدي. اثر تحكييه اداسي چيخارتسادا ايدديعا ائتديي ژانرين حودودوندا قالا بيلمه­ ميشدير. ژانر حودودونو پوزولماز بير تابو سانميرام. لاكين بير اثر ايدديعا ائتديي ژانرين اساس حودودلاريني رعايت ائتمه­ يه ­نده او ژانرين آراشديريجيلاري­ نين اثري ژانرا داخيل ائتمه­ مه­ لريني طبيعي بيليرم. تحكييه­ ده شئعرييت ده گئده بيلر لاكين بو شئعرييته زمينه يارانمالي­ دير. اونون پوئتيك توجيهي اولمالي­ دير و بيلدييينيز كيمي هر اثرين پوئتيكاسي ايلك مرحله ­ده اثرين ايچ قانونلاريندان يارانمالي­ دير. براهني ­نين «آزاده خانوم» اثرينه باخين. شيزوفئرنيك سطيرلرين يارانماسينا نئجه زمينه يارانميشدير. نثرده ­كي شئعرييته ريوايتي آپاران ذئهنين داورانيشلاري و اوبرازلارين اؤزللييي اساسيندا دا ياناشماق اولار. بو اؤزونو آيدينجا مونولوق يازيلاردا گؤستره بيلر. مسله ­نين بديهي اولماسيندان بحثينه گيرميرم.  

2. سون آي­لاردا، اينترنت دوشرگه­ سينده بعضي ادبيياتچي­لاريميزين آراسيندا «ائروتيزم» قونوسويلا باغلي حتتا قيزغين دارتيشمالار اولدو... بونون آرديندا، بو مؤوضوعا دا توخونماغيميز ياخشي اولمازمي؟ 

ادبيياتدا ائروتيكا تزه بير مسله دئييل. ائله ادبيياتين اؤزو قدر قيدمتي اولماسيني سانيرام. بيزيم ادبييات­دا دا گوجلو ائروتيك سطيرلر و بئيت­لر واردير. اينسانين هر بير حيسسي كيمي ائروتيكانين دا متنده حاضير اولما حاققي واردير. هئچ كيم بو حاققي دانيب و يا آلا بيلمز. فرويد بو مسله­ نين اينسان پسيخولوگيياسيندا نه درجه ­ده اؤنم داشيديغيني دوشونمه­ يه اساس يول آچميشدير. گاهدان بؤيوك اثرلرده ائروتيك سطيرلرين اولماماسي بؤيوك نوقصان­لار يارادا بيلر. آمما ائروتيك يازي­يا، اثرين ايچيندن طلبات اولمالي­ دير. يعني متنين ايچ قايدالاري گرك اونون ضرورتيني اوزه چكسين. ايدئولوژيك و يا كونسئرواتيو جمعييتلرده بو مسله­ نين ياساق محدوده حئسابلانماسي، بو مسله­ ني خطرلي و يا اينحيرافي يوللارا چكه بيلر. بئله كي يازيچي اونو بير عوصيان بايراغي كيمي ايشلتدييندن اثرين داخيلي ايستكلريني و ضرورتلريني حاشييه­ يه ايته ­له ­يير. گاهدان داها دقيق باخارساق ادبي اثر ياراتمير. جينسي مسله ­ني عونوان ائدير. گاهدان غئيري-ادبي آلقيشلارلا دا اوزله ­شير. بو آلقيشلاري محدود جمعييتين ياساقليق­لار اؤنونده پسيخولوژيك داورانيشلار حيطه­ سينده معنالانديرمالي­ ييق. «اوسكار»،«كان» و يا هئچ بير فيلم فئستيواليندا پورنو بير فيلمين اولماسيني گؤزله­ ميريك كي؟ غربين پورنو فيلمين يارانماسينا پسيخولوژيك دلاييلي واردير. بو بحث منيم تخصصوصوم حيطه­ سينده دئييل و البتته يئري ده بورادا دئييل. آمما هئچ بير توجيه پورنو بير فيلمي جيددي صنعت دغدغه­ سي اولان بير فئستيوالين حددينه يئتيره بيلمز. بونون يئري اورا دئييل. ادبيياتدا دا بئله اولمالي ­دير. اثر هرنه­ دن اؤنجه ادبييات اولمالي ­دير. شاعيرانه­ ليك بحثينده دئدييم كيمي ائله بورادا دا هر مسله ائستئتيكا و پوئتيكا فيلتئريندن كئچمه ­لي­ دير. ائستئتيكايا دايانان پوئتيكا متنين اساس مئتودو­دور. سون واختلار بيزيم ادبيياتدا دا ائروتيك ادبييات آدينا بحثلر و اثرلرين گئتدييني ايزله­ ميشم. بو مسله ده قوزئي ادبيياتي­ نين شراييطيني و اونا ياناشماغيميزين جينسي­نين فرقلي اولدوغونو ظنن ائديرم. آمما بير تنقيدچي كيمي گونئي ادبيياتيندا بو ادبيياتا يئر يوخدور دئيه بيلمه ­رم لاكين يارانان اثرلرين كئيفييتلريني نظرده توتاركن عومومن اونون پوبليسيستيك كؤكلريني ادبي جيدديليكدن اوستون گؤرورم. منجه بو مسله ادبيياتيميزين بو گونكو وضعييتينده ان جيددي ادبي پروبلئميميز دئييل. بونون بيزلرده پوبليسيستيك ايشله­ يي واردير. گاهدان بحثلريميزي اساس مسيريندن ده يايينديرا بيلر. بير شخصي سلقه حئسابلانسا من «ادبيياتدا ائروتيكا»ني «ائروتيك ادبييات» تئرمينيندن داها اوستون ده ­يه­ رلنديريرم.

  3. بو دانيشيقدا، «داستان کوتاه» آنلاميندا «اؤيکو» دئديييمده، سيز کسکين­ليک­له «حيکايه» سؤزونو ايشلَتدينيز... يازي شکلينده گئتمه­ دييي دارتيشمالاريميز قيراقدا قالسين، آنجاق سيزه اورَکدن سايغي بَسله ­ديييمدن، بورادا بوتونلوک­له «حيکايه» سؤزوندن يارارلانديم.  بو وورغولامانين سببي­ نه­ دير؟ نييه «حيکايه»؟!

  تحكييه ژانرلاري آراسيندا اولان حودود چوخدا موعيين جيزگي­لرله آيريلمير و اوصولن تركيب ائتمه­ نين بوتون صنعت ژانرلاريندا اساس رول اويناديغينا دوشونرسك، هئچ بير بؤيوك اثري موطلق ايدديعا ائتديي ژانرين سينيرلاريندا گؤره بيلمه­ يه­ جه ­ييك. آمما بو حودودو تعيين ائتمه ادبي تنقيدين اساس لوازيماتيني الده ائتمك دئمكدير. ان اسكي دؤورلردن ياشايان تحكييه­ چيليك، موختليف زامانلاردا و شراييطده موختليف اؤزللييه داياناراق فرقلي ژانرلارين يارانماسينا سبب اولموشدور. كلاسيك فضادان مودئرن فضايا گيرديكده هر ژانر اؤزونو يئني شراييطله تطبيق ائديب، اؤز مودئرن ادبي نؤوعونو ياراتميشدير. مثلن «رومان»، «رومانس»ـين مودئرنلشمه­ سي­ دير و «حيكايه» ده؛ «ناغيل»، «تمثيل» و «حيكايت»ـين يئريني توتوبدور. مودئرن تحكييه نؤوعو، كلاسيك نؤوعلري­له، اثرين داخيلي دييالئكتيكاسينا اساسلانمادا فرقله ­نير. بورادا اينسان پسيخولوگيياسي و حاديثه ­لرين داخيلي نه­ دن­ لرينه ديققت واردير. بو فلسفه­ سي ده ­ييشميش ژانرلارين، اسكي فورمالاريلا آددا دا  فرقلريني نظرده توتماميز گركدير. يعني تئرمينلري عئلمي و ديلين طبيعي آخاريني نظرده توتاركن ياراتمالي­ ييق. مودئرن تحكييه ­نين اساس قايناغي غرب اولان يئرده اورادا گئدن تئرمينلرين قبولا آلينما پروسه­ سي بوتون دونيا ادبيياتلاريندا اؤرنك كيمي گؤتورولموشدور. بعضن تئرمين ائله اورادان گلميشدير. ميثال اولاراق هئچ كيم «رومان» سؤزجويونه يئرلي بير قارشيليق تاپما سيخينيسيندا دئييل. ائله همين مئتودا اساسلانساق كلاسيك نؤوعلريميزي «ناغيل» عونواني آلتدا يئكونلاشديرماق اولار. «خالق ناغيللاري»، «تمثيل­لر»، «حيكايت­لر» و باشقالاري بوسيرادان­ديرلار. يعني هاميسي شيفاهي­لييه و ديالئكتيكانين ضعيف گئتمه­ سي اؤنونده آچيق تخييوله دايانيرلار. «ناغيل» سؤزجويونون ده عربجه­ ده «نقل» سؤزجويوندن اولماسي بو مسله ­نين اينگلتره ­ده «Tale» سؤزجويونون نه درجه ­ده يئرينه اوتورا بيلمه قابيلييتيني گؤستره بيلر. تحكييه­ سؤزجويو ايسه«Fiction» يئرينده اوتورمالي­ دير. مودئرن تحكييه ژانرلاري اؤز آدلاريلا تانيليرلار. «رومان»، «پووئست»، «اوچرئك»، «فئليئتون» و ان چوخ موناقيشه­ لي و ايمكاناتلي ژانر اولان «حيكايه» ژانري. بونلار هاميسي مودئرن تحكييه ژانرلاري­ ديرلار. آمما «حيكايه» ژانري حاقدا نئچه ايضاحي گركلي سانيرام. بو ژانري «حيكايت» نؤوعونون مودئرنلشميشي كيمي ده قلمه وئرمك اولار. «رومان» سؤزجويونون ده «رومانس» سؤزجويونه بنزريشي همين فلسفه اساسيندا اولموشدور. يعني «حيكايت»، «حيكايه»­يه چئوريلينجه مودئرنلشمه پروسه­ سيندن كئچمه­ لي­ دير. ايلك مودئرن تحكييه ­چي­ لر بو يازديقلاري و غربده«Short story» آدلانان ژانري «حيكايه» آدلانديرميشلار. هئچ بير كلاسيك متنده «حيكايه» محض بو فورمادا ايشله ­نيلمه­ ميشدير. البتته ايلك يازارلار او زامانين عرب اليفباسيندا يازديقلاري متنلرده فونونتيك قايدالاري نظرده توتولماديقلاري اوچون بو سؤزجويو «حكايه» فورموندا يازميشلار. بوتون آذربايجان، توركييه و باشقا تورك اؤلكه­لرينده بئله اولموشدور. لاتين­لشمه فونوتيك قايدالارا آرتيق ديققت طلب ائديردي. توركييه­ ده«ə» حرفي اولماديغيندان سؤزجوك«Hikaye» فورماسيني آلميشدير. عيراق توركلري «حيكايه» يازميشلار. آمما قوزئي آذربايجاندا آذربايجان توركجه­ سي­ نين قيرامماتيكا و اورتوقيرافيياسيندا ايلك نسلين فارس و عرب كؤكلو سؤزجوكلره اساسلاناراق بو ديل­لرين قيرامماتيكا و تلففوذلرينه دايانديقلاري حالدا سؤزجويو غلط اولاراق«Hekayə» ضبط ائله ­ميشلر. بو پروسه صيرف بو سؤزجوكده اوز وئرمه­ ميشدير. آذربايجانين توركجه ­سي هله اؤز قيرامماتيك اؤزلليك­لريني ثبت و تدوين ائتمه ­ميشدي و ضيالي­ لار روس ديلي آخيمي اؤنونده فارس و عرب قيرامماتيكايا ضيمني اساسلانمالاري وار ايدي. حال بو كي فارسجادا بو سؤزجويون ايلك هيجاسيندا گئدن e سسي آذربايجانجادا i سسينه دؤنمه­ لي ايدي. كوتله ديلي نين ده ياتيمي «حيكايه» تلففوذونده­ دير و آذربايجانلي ­نين فونوتيك حنجره ­سي «حئكايه» دئمك­ده چتينليك چكير. منجه توركييه و عيراقدا گئدن تلففوذ دوزدور و بيزده ده بئله اولمالي­ دير. باشقا سؤزجوكلرده ده بئله­دير: «رئوايت» يئرينه «ريوايت» ، «ائنسان» يئرينه «اينسان» و... آذربايجان لاتين اورتوقيرافيياسيندا گونئي آذربايجانين اؤزلليك­لري نظرده توتولماديغيندان و گونئيين، قوزئي اورتوقيرافيياسيندا تأثيري­ نين آز اولدوغوندان بيز ده بو اورتوقيرافيياني رعايت ائتمه ­لي­ ييك. يعني لاتينجه متنلريميزده بو موصطلح غلطي يعني«Hekayə»ني ايشلتمه ­ميزي ضررسيز بيليرم. لاكين عرب اليفباسيندا موطلق «حيكايه» يازمالي ­ييق. بو؛ سؤجويون ديل قيرامماتيكاسي و فونوتيك دييالئكتيكا قايدالاري اساسيندا يارانان فورماسي­دير. بورادا ژانرين ديالئكتيكي اينكيشافي سؤزجويون ديلده گئدن ديالئكتيكي اينكيشافي­لا تطبيق اولونور. آمما سون ايللرده گاهدان ايشله­ نيلن «اؤيكو» سؤزجويو حاقدا. بو سؤزجوك قوزئي آذربايجاندا موطلق ايشله­ نيلمير و آنادولو ادبيياتي ايله ايلگي­لي اولمايان شخص اوچون آنلاشيلان بير تئرمين دئييل. توركييه­ ده ايسه چوخ يئني بير تئرمين­دير و حتتا پروفئسسيونال تحكييه­ چي­لر ده بئله گاهدان اونو ايشلتمك­دن چكينيرلر. «ياشار كامال»،«عزيز نسين»،«اورهان كامال» و بوتون بؤيوك كلاسيك­له­ شن يازارلارين كيتابلاري اوزره «Hikaye» يازيليبدير. ان يئني چاپلاردا دا هله بئله گئدير. منجه بو سؤجويون آذربايجان توركجه­ سينده نه كؤكلو اولوب-اولماماسي پئشه­ كار لوغت­شوناس­لاريميز طرفيندن آراشديريلمايينجا و اونون نه­ اولدوغو بللي اولمايينجا، اوندان ايستيفاده ائتمه­ مه ­لي­ ييك. چوخلو توركييه توركجه ­سينده عئلمي توجيه ­لري اولان تئرمين­لر آذربايجانجادا چاتيشمامازليق ياراديرلار. پس سؤزجويون اورادا گئدن توجيه يندن اؤنجه يئرلي شاخيصه­ لره باخمالي­ ييق. مسله­ ده بير آز مودا گيريشمك واردير. توركييه ادبيياتي دونيادا تانينميش و اؤنملي ادبييات اولدوغو اوچون بيزده اونلارا اوخشاماق ايسته ­ييريك. بو پروسه­ يه تاي قاباقجالاردا ادبيياتيميزدا اوز وئرميشدير. جوغاتاي(اؤزبك) ادبيياتي امير عليشير نوايي كيمي بير داهي­ نين اثرلري نوفوذويلا بوتون تورك ادبيياتلاريندا ائتكي بوراخميشدير. آنادولودا و آذربايجاندا چوخلاري جوغاتاي­جا يازماغا گيريشميشلر. مسيحي­ نين ديوانينا باخا بيلرسينيز. آمما ادبيياتين اساس يولو يئرلي­ ليك­دن گئدير. توركييه­ نين ادبيياتدا و اؤزلليك­له رومان­دا الده ائتديكلري چوخ ده ­يه رلي­ دير و بير تورك اولاراق بيزلره گووه­ نمه­ لي­ دير ده. اؤيره ­شمك موضئعينده ايسه توركييه ­لي موخاطب­لردن سونرا دايانانلار سيراسيندا اولدوغوموز داها خوشبختليك­دير. آمما ياراديجيليقدا و تئرمينولوگيياميزدا موطلق يازديغيميز ديلين يعني آذربايجان توركجه ­سي ­نين طلباتيني نظرده توتمالي ­ييق.

[1] بو تئرمينيين كيمدن اولماسيني اونوتموشام. آمما اونون ميرجلال دان اولماسيني ظن ائديرم.

[2] Tostبيرينين ساغليغينا ايچمك. :

[3] Tamadaقوناقليق­لاردا، توي­لاردا و س.-ده مجليسي ايداره ائدن شخص. :

[4] بو كيتابي آذربايجان حيكايه ­لري كيتابي­نين تئوريك بؤلومو كيمي يازسام دا موستقيل وارليغا ماليك بيليرم.

[5] سيزسيز-آنار-باكي-گنجليك-1992-«نثرين فضاسي» مقاله ­سي-ص323-373

[6] ظننيمجه محمدعلي سپانلودان

[7] vestibül:عومومي بينالارين گيره­ جه­ يينده اولان دهليز

+ يازيليبدير  87/10/09ساعات 11:42  محمد صبحدل   | 

شیرمحمدزادهگون اورتا ايدي. نيسا­ن گونشي هر يئره يايلميشدي و يئل آغاجلارين سارالميش يارپاقلاريلا قووالا-قاچدي اويناييردي. خديجه پنجره­نين داليندان چكيليب:

-سارالميش يارپاقلاردا هله ده ذؤوق وار،  باخ گؤر نئجه يئل ايله اويناقلاييرلار، - دئدي، - من ده نييه ذؤوق يوخدور،  نييه اوره­ييم هئچ آچيلمير،  من كي هله ساراليب- سولماميشام ، ياشاييشيمين خزانينا گيرمه­ميشم،  نييه ووجودومدا حيات دان خبر يوخدور؟ نه دن بؤيله­ اولدوم،  اؤلولرله منيم نه فرقيم ؟ فرقيم ساده­جه تورپاقدادير.


مطلبين آردي
+ يازيليبدير  87/06/21ساعات 11:27  محمد صبحدل   | 

«معاريفدن، عئلمدن محروم اولان خالق ايشيقدان محرومدور»

روسييادا ايلک تورک قزئتي «اکينچي»نين ياراديجيسي

حسن به­ي زردابي بئله دوشونوردو

 

  کنياز آسلان

 باکي دؤولت اونيوئرسيتئتي نين دوکتورانتي، دوسئنت،

 «قيزيل قلم» موکافاتي لاورئاتي

 

 

 

 

ميلادي تاريخله 1828-1832-جي ايللر آراسيندا تيفليس شهرينده روس ديلينده «تيفليس­سکيئ وئدوموستي» («تيفليس خبرلري») بوللئتئني نشر اولونوردو. آرخيو منبعلرينه گؤره، بو بوللئتئنين ترجومه نوسخه­لري 1829-جو ايلده گورجو ديلينده، 1830-جو ايلده فارس ديلينده، 1832-جي ايلده ايسه آذربايجان تورکجه­سينده بوراخيليب. آذربايجان ديلينده چيخان بوللئتئنين آدي «تاتار اخباري» ايدي.

 


مطلبين آردي
+ يازيليبدير  87/05/25ساعات 21:1  محمد صبحدل   | 

بو گئجه­ده بوغولورموش كيمي خيريلدادي،‌يئرينده چيرپيندي ، حيسس ائله­دي كي، بوز كيمي سويوق بير شئي بالديرلارينا دولاندي، سونرا يايا دؤنوب فيرلانا – فيرلانا يوخاريلارا قالخدي، كوره­يينده ، سينه­سينده گزدي، ايلان تكين سارينيب بدنيني سيخدي و بيردن يوماق­لانيب بوينونا دوشدو. او ، نه قدر اللشديسه­ده گئديكجه داراليب نفسيني كسن ، قيوريلا – قيوريلا بوينونو سيخان بو اوشوتمه­­لي سويوقلوقدان ياخاسيني قورتارا بيلمه­دي، ‌اليني اوزاداندا بيلك­لري­ده كئييدي. ....

 


مطلبين آردي
+ يازيليبدير  87/03/21ساعات 11:39  محمد صبحدل   | 

خيياوان سالماديم قابيق­لارينيزدان

و سورمه­ديم اللرينيزله سانجيلان گؤزقابي­لار ايزيندن

 

 

 


مطلبين آردي
+ يازيليبدير  87/03/21ساعات 2:29  محمد صبحدل   | 

 

 

موحاريبه موطلق­ديرمي؟

 

 

 

 

 

آلبئرت ائينشتئينه[1] مكتوب/آوسترييا عاليمي، پسيخياتر[2]- حكيم، پسيخوآناليزين باني­سي زيقموند فرويد[3]   1939-1856

ويانا، سئنتيابر ، 1932

 

ترجومه: آنار/کؤچورن: نسرين شيرمحمدزاده

 

عزيز جناب ائينشتئين!

بيلنده­كي، منه سيزي ماراقلانديران و رأيي­نيزجه باشقالارينين دا ديققتيني چكمه­يه لاييق اولان بير مؤوضوعون موذاكيره­سينده ايشتيراك ائتمه­يي تكليف ائديرسينيز، درحال راضيلاشديم. ائله دوشونوردوم كي، سئچدييينيز مؤوضوعا هر بيريميز- فيزيك يا پسيخولوق، بو گون ناييل اولدوغوموز بيليك­لر[4] سويييه­سيندن ياناشا بيلر و بئله­ليك­له هره­ميز بير طرفدن يولا چيخساق دا، عئيني بير نؤقطه­ده گؤروشه بيله­ريك. آمما دوزو، مسله­نين قويولوشو مني تعججوبلنديردي: بشريييتين موحاريبه­نين دهشت­لي تهلوكه­سيندن خيلاص اولونماسي اوچون نه ائتمك لازيم­دير؟ ايلك آندا اؤزومون (آز قالا دئيه­جكديم هاميميزين) بو مسله­ده سرريشته­سيزليييميزدن قورخدوم، آخي موحاريبه­نين اولوب- اولماماسيني پراكتيك[5] جهتدن دؤولت خاديم­لري حلل ائدير. داها سونرا آنلاديم كي، سيز مسله­ني عاليم- فيزيك كيمي يوخ، هومانيست[6] دونياگؤروشلو اينسان كيمي قويورسونوز. اونو دا دوشوندوم كي، مندن كونكرئت[7] تكليف­لر گؤزله­ميرلر، من يالنيز موحاريبه­نين قارشيسيني آلماق پروبلئميني پسيخولوق كيمي ده­يرلنديرمه­لي­يم.


مطلبين آردي
+ يازيليبدير  87/03/21ساعات 2:17  محمد صبحدل   | 

فوضولی

 1- غوواصئ- بواحيرئ-ريوايت،

     سيياحئ- بواديئ-حيکايت

 

2- دريايئ- ريوايتي اوزنده،

     صحرايئ-حيکايتي گزنده.

 

3- دوزموش بو نيظام ايلن گؤهرلر،

     وئرميش بو ادا ايلن خبرلر.

 

4- کيم وار ايدي بير خوجسته سيما،

     ايدراکي تامام، طبعي غوررا.

 

5- اشياء تکللوموندن عاريف.

     هر السينه­دن اولوردو واقيف


مطلبين آردي
+ يازيليبدير  87/03/21ساعات 2:8  محمد صبحدل   | 

قوشلار دئييليشي­جه  داشلانا بيلمه­م

نه دميردن    نه داشدان

باخيشيمين اؤنو دليك-دليك­دير

                                     بوتون اووولتولار ساياغي

گلين قناره­دن[1] آسيلاق



[1] narə:قصصابلارين ات آسلاديغي چنگک

+ يازيليبدير  87/03/21ساعات 1:33  محمد صبحدل   | 

 

 

( آذربايجان اينجه­صنعتي كيتابيندا ، قديم دؤورلرده قافقاز آلبانيياسي، ماغارالار، مئنهيرلر، دولمئنلر ، كورقانلار و س. آد آپاريليب ، شرح وئريليبدير.

كيتابين موکمميل نشري موجوويز نؤوبه­سينده­دير.)

 

 

ماغارالار

آذربايجان اراضي­سينده تاپيلميش ماغارالار ان ايبتيدايي و ان قديم اينسان مسكنلري كيمي قيمتلي­دير. بئله آبيده­لره ميثال اولاراق ، قازاخ رايونوندا ،آوئي­داغدا تاپيلميش ايكي ماغاراني و فوضولي شهرينين ياخينليغينداكي آزيخ ماغاراسيني گؤسترمك اولار. 215-220 مئتر اوزونلوغوندا اولان آزيخ ماغاراسي سووئت ايتتيفاقيندا تاپيلميش ان بؤيوك ماغارادير. اونون بؤيوك اوتاقلاريندا  چوخلو قايا رفلري  واردير كي ، بونلاردان بعضي­لرينين آلتيندا 150-100  آدام يئرله­شر. بو عضمتلي ماغارانين دووارلاريني  چوخلو طبيعي سيتالاكتيت  بزه­يير كي ، بونلاردان سورالار اورتا عصر مئعمارليغيميزدا  دا گئنيش  صورتده ايستيفاده ائديلميشدير. 


مطلبين آردي
+ يازيليبدير  87/03/21ساعات 1:24  محمد صبحدل   | 

محمد صبحدل

 

قابار کپنک­لريني ميلاخ – ميلاخ سرديم حسرت کردي سينه

آياقدان آبيده­لر     کلمه – کلمه  يول

و "هارا" گئتمک ، "نه­يه" گئتمه­يي يووارلاتمادي      يووارلادانمادي

 


مطلبين آردي
+ يازيليبدير  87/03/21ساعات 1:17  محمد صبحدل   | 

نرگیز پاشایئوامعلومدورکي، بديعي ادبيياتين، سؤز صنعتينين بوتون زامانلار بويو  ده ييشمز مؤضوعسو، اساس پرئدمئتي[1] اينسان اولموشدور.

عوموميييتله، سؤز صنعتي­نين، ادبيياتين تاريخي بشريييتين اؤز تاريخي­دير. تدقيقاتچيلار دؤنه–دؤنه قئيد ائتميشلر کي، اينساندا گئرچک­لييه بديعي– حيسسي موناسيبت هله صنعتين يارانماسيندان چوخ – چوخ اووللر مئيدانا گلميشدير. گئرچکلييه بديعي موناسيبت، هئچ شوبهه­سيز، طبيعتله موناسيبتده، طبيعتين ايلهام وئريجي تأثيري نتيجه­سينده يارانميشدير.


مطلبين آردي
+ يازيليبدير  87/02/12ساعات 0:42  محمد صبحدل   | 

محمد صبحدلو بو شيديرغي ياغيش ائله خيياوانلارين قوتور اوزلرينه، تيكينتي­لرين اوجا هئيكل­لرينه، قنوولارين-قالديريملارين چاتلاميش جدول­لرينه و بوتونلوكده شهرين پئيسرينه چيرپدي و چالالاردا قالانيب، گؤل اولوب، داشماغا باشلادي كي؛ احد جاببارزاده سو داملالارينين او پاييز آخشاميندا، تئهران كيمي بؤيوك بير شهرين بوتونلويونو يويوب آپارماق قصد ائله­ديكلريني، ظنن ائتدي.

 

بو اثرین ایملر سایتی واسیطه­سیله PDF فورمتینده یاییلان نوسخه­سینی بورادان دانلود ائده بیلرسینیز.

+ يازيليبدير  86/12/19ساعات 9:52  محمد صبحدل   | 

ايتالو كالوينوسكي­دن ائنيب آرخايا بير نئچه آدديم آتاندان سونرا كوچه­نين دوز اورتاسيندا دايانيب اللريمي آغزيما آپارديم و بينانين يوخاري مرتبه­لريندن بيرينه باخاراق قيشقيرديم:

-تئ – رئ - زا!


مطلبين آردي
+ يازيليبدير  86/11/18ساعات 23:43  محمد صبحدل   | 

مؤولود سولئیمانلیحليمه گؤزلريني آچان کيمي پنجره­يه باخدي، گؤردو کي، شوشه­لرده غريبه-غريبه ناخيشلار وار. قالخيب پنجره­يه ساري گئتدي، دوزو-دونياني دوم-آغ گؤردو، معططل قالدي. دوزو-دونياني دئيه­نده کي، گؤزونه گؤرونن آلچاق-آلچاق، ايريم-اويروم تپه­ليکلره دوشموش شهردي، شهرين ايري-ايري، اوجا-اوجا ائولريدي، کؤنده­لن-کؤنده­لن، دؤنگه­لي-دؤنگه­لي يوللاريدي.

قاري گؤره­ن کيمي اوشودو، زرخارالي خالاتينا بورونوب:

- آا، قار،-دئدي.


مطلبين آردي
+ يازيليبدير  86/11/18ساعات 23:27  محمد صبحدل   | 

کامال عبدوللا

کامال عبدوللانین رومانی حاقدا/ت.سالام اوغلو/کؤچورن: ویدا ناصحی

 

کامال عبدوللانين «ياريمچيق ال­يازما» روماني 2004 -  جو ايلين ادبي پروسئسي­نين محصولودور. کئچن بو آز موددت عرضينده ادبي موحيط­ده رومانلا باغلي موباحيثه و موذاکيره­لر اونو ايلين روماني کيمي قييمت­لنديرمه­يه جيددي اساس وئرير. موعلليف اؤزو رومانلا باغلي اوتوز يازي چيخماسي حاققيندا معلومات وئرسه ده، اثري «آذربايجان ادبيياتيندان اولاي» کيمي قييمت­لنديرن تورکييه­لي يازار عيرفان اولکونون «آذربايجانين اومبئرتو ائکوسو» آدلي اينتئرنئت يازيسيندا قزئت­لرده، ادبييات درگيلري و اينتئرنئت صحيفه­لرينده اثرله باغلي اوچ يوزدن آرتيق يازي­نين چاپ، اولونماسي، روس و فرانسيز ديللرينه ترجومه­سي­نين ايشيق اوزو گؤرمه­سي، ياخين زاماندا تورک ديلينه ده چئوريله­جه­يي حاققيندا معلومات وئرير.

 

مطلبين آردي
+ يازيليبدير  86/11/18ساعات 20:48  محمد صبحدل   | 

مؤولود سولئیمانلیآرخئ­تيپيك[1] ستروكتورلار[2]

دونيا ادبييياتي، ائله­جه ده آذربايجان ادبييياتيندا ميفولوژي[3] سوژئت[4] و اوبرازلارا[5] داها چوخ اوز توتولماسي،19-جو عصرده رئالليغين[6] اؤلچولري­نين خئيلي گئنيشلنمه­سي و عئلمي- تئخنيكي[7] اينقيلابلار، ايقتيصادي يوكسه­ليش­لرله علاقه­لي ايدي.


مطلبين آردي
+ يازيليبدير  86/11/02ساعات 1:31  محمد صبحدل   | 

 محمد صبحدل

  

سونرا خدجه ننه م بیر دنه شام آلدی. بیلمیرم بیر دنه شام آلدی، یا بیر دنه شام آلا بیلدی. آلدی قوجاغینا منی. اوشاق دئییلدیم، آمما پوک اویدوم یونگول اویدوم. قارنیم دا ائله اوولدن شیشکین ایدی. دؤشلریم سه نارین. ...


مطلبين آردي
+ يازيليبدير  86/09/20ساعات 9:47  محمد صبحدل   | 

من قوللوقچويام، آما منيم اوچون ايش تاپيلمير. چکينگن­ام، اؤزومو ايره­لي وئرميرم، هئچ باشقالاري ايله بير سيرايا دا سوخولمورام، آما بو منيم ايشسيزليييمين يالنيز بير سببي­دير، اولسون کي، عومومييتله، بونون منيم ايشسيزليييمه آزاجيق دا اولسا دخلي يوخدور، بوتون حاللاردا اساس مسله اودور کي، ...


مطلبين آردي
+ يازيليبدير  86/09/12ساعات 8:50  محمد صبحدل   | 

+ يازيليبدير  86/07/29ساعات 10:37  محمد صبحدل   | 

اؤز-اؤزلويونده او، هئچ کيم ايدي؛ باشقالاريلا حتتا تاريخين ان پيس صورتينده ده اويغونلوغو اولمايان اوزونده و سايسيز-حئسابسيز، خيالي، علاقه­سيز سؤزلرينده يالنيز کيمسه­نين گؤرمه­دييي سويوقلوق، رؤيا گيزله­نيردي. اوولجه اونا ائله گليردي کي، بوتون اينسانلار دا اونون کيمي­دير، آمما..


مطلبين آردي
+ يازيليبدير  86/07/25ساعات 11:4  محمد صبحدل   | 

محمد صبحدل

يئتيشمه­يه باشلاديق

قورولان اللرين هؤرونمه­دن­لريني آسلاديق ايليق ائرته ­قامتينه

وشورانليغيم سوروندو سنيندن سنين

 

 

 

 


مطلبين آردي
+ يازيليبدير  86/07/12ساعات 17:33  محمد صبحدل   | 

محمد صبحدل

ياشيلليغين ايزي گئتدي، تالاندي ماهني­لاريم

و يار سانديغيم اينسانلار اولدولار حئصاريم

 

 

 


مطلبين آردي
+ يازيليبدير  86/07/12ساعات 17:11  محمد صبحدل   |